काँग्रेसच्या हुकूमशाहीचा इतिहास आता एन्.सी.ई.आर्.टी.च्या विद्यार्थ्यांसमोर !

मुंबई – राष्ट्रीय शैक्षणिक संशोधन आणि प्रशिक्षण परिषदेने (एन्.सी.ई.आर्.टी.ने) इयत्ता नववीच्या सामाजिक शास्त्राच्या अभ्यासक्रमात वर्ष १९७५ च्या आणीबाणीचा विषय समाविष्ट करण्याचा निर्णय घेतला आहे. या निर्णयाचे शिवसेना नेत्या आणि महाराष्ट्र विधानपरिषदेच्या उपसभापती डॉ. नीलम गोर्‍हे यांनी स्वागत केले. विद्यार्थ्यांना देशाच्या लोकशाहीच्या इतिहासातील महत्त्वाच्या घटनांची जाणीव होणे आवश्यक असल्याचे त्यांनी म्हटले आहे.

त्या म्हणाल्या, ‘‘काँग्रेसने आणीबाणी लागू करून देशात हुकूमशाही व्यवस्था निर्माण केली होती. त्या काळातील परिस्थिती, लोकशाही संस्थांवरील परिणाम आणि नागरिकांच्या स्वातंत्र्यावर आलेली बंधने यांची माहिती विद्यार्थ्यांना मिळणे आवश्यक आहे. आणीबाणीचा काळ मी विद्यार्थीदशेत अनुभवला. तेव्हा प्रसारमाध्यमांवर निर्बंध होते आणि वृत्तपत्रांमध्ये बातम्या प्रकाशित होत नव्हत्या.’’