Indus Water Treaty Crisis : सिंधू जल वाटप करारावरून पाकने काश्मीरमधील सीमेवर तैनात केले ३५ ड्रोनविरोधी युनिट !

श्रीनगर (जम्मू-काश्मीर) – सिंधू जल वाटप करारावरून भारताशी युद्ध करण्याची धमकी पाकच्या संरक्षणमंत्र्यांनी दिल्यानंतर काश्मीरच्या नियंत्रण रेषेवर पाक सैन्याच्या ८ ब्रिगेडने ३५ ‘अँटी ड्रोन युनिट’ तैनात केले आहेत. लेझरने सुसज्ज असलेले हे युनिट हवाई आक्रमणे रोखण्याचे काम करतील. पाकने ‘एआय फेन्सिंग’ही (कृत्रिम बुद्धलमत्तेचा वापर करून निर्माण केलेले एक आभासी कुंपण) केले आहे. याअंतर्गत टार्गेटिंग (लक्ष्य करणे) आणि सर्व्हिलन्स (लक्ष ठेवणे) वेगवान करण्यात आले आहे. इलेक्ट्रॉनिक वॉरफेअर (दळणवळण यंत्रणेवर ताबा मिळवून ती निकामी करणे) आणि ‘काउंटर ड्रोन ग्रिड’ही (ड्रोन शोधून नष्ट करणारी स्वयंचलित यंत्रणा) सिद्ध केले आहे. पाकने अफगाणिस्तानला लागून असलेल्या त्याच्या सीमेवरून ५ बटालियन या महिन्याच्या प्रारंभी हलवून नियंत्रण रेषेवरील रावलाकोट आणि कोटली या भागांमध्ये तैनात केल्या आहेत.