श्री राजमातंगी महायज्ञाच्या भव्य मंडपाची उभारणी युद्धपातळीवर चालू !

मुंबई, १४ मे (वार्ता.) – भारताच्या रक्षणासाठी सनातन संस्थेने आयोजित केलेल्या श्री राजमातंगी महायज्ञाचा प्रसार मागील १ महिन्यापासून चालू आहे. यज्ञाला केवळ २ दिवस शेष राहिले आहेत. त्यामुळे प्रसाराप्रमाणेच महायज्ञाच्या भव्य मंडपाच्या उभारणीचे कार्यही युद्धपातळीवर चालू आहे. १६४ फूट रुंदी, ३७८ फूट लांबी आणि ५० फूट उंची असलेला आणि ५ सहस्र भाविक बसू शकतील असा भव्य मंडप उभारण्यात येत आहे.

यज्ञकुंड, व्यासपीठ, यज्ञमंडप, प्रदर्शन मंडप यांचे जवळजवळ ७५ टक्के काम पूर्ण झाले असून १५ मेपर्यंत हे काम पूर्ण होईल, अशी माहिती आयोजकांनी दिली.

‘यज्ञाचा प्रारंभ श्री गणेश आवाहन, पुण्याहवाचन आणि महासंकल्प यांनी होईल. श्री राजमातंगीदेवीच्या मूलमंत्रांच्या जयघोषात आहुती अर्पण केल्या जातील. यज्ञाचे पौरोहित्य इरोड, तामिळनाडू येथील शिवागम विद्यानिधी आगमाचार्य श्री. अरुणकुमार गुरुमूर्ती करतील तर शिवाचार्य श्री. गुरुमूर्ती हे यज्ञाचे मुख्य आचार्य असतील, असे पुरोहित अन् ज्योतिर्विद श्री. श्रेयस पिसोळकर म्हणाले.

यज्ञकुंडाची उभारणी शास्त्रानुसार करण्यात आली आहे. भाविकांना बसण्यासाठी आसंद्यांची व्यवस्था करण्यात येणार आहे. उन्हाचा त्रास होऊ नये, यासाठी वातानुकूलन यंत्रे आणि कुलर यांची व्यवस्था करण्यात आली आहे. भाविकांना जागेवरच पिण्याचे पाणी उपलब्ध करून देण्यात येणार आहे.

यज्ञस्थळी असणार विविध प्रदर्शने !

सनातन संस्थेच्या अध्यात्मशास्त्र, धर्म, राष्ट्र, संस्कार, आयुर्वेद, व्यक्तीमत्त्व विकास आदी लोकप्रिय ग्रंथांचे प्रदर्शनही लावण्यात येणार आहे. औषधी वनस्पती आणि आपत्कालीन उपाययोजना यांची माहिती देणारा विशेष कक्षही असतील. सनातन संस्थेची २६ वर्षांची वाटचाल, हिंदु जनजागृती समितीचे कार्य, ‘सनातन प्रभात’ वृत्तपत्राचा राष्ट्र-धर्म कार्यातील परिणाम आदींची फ्लेक्सद्वारे माहिती देण्यात येईल. ही सर्व प्रदर्शने १३० फूट लांबी आणि ४० फूट रुंदी असलेल्या मंडपात असतील.