धर्माचरण आणि नामस्मरण केल्याने देवाचा आशीर्वाद प्राप्त होतो ! – महंत श्री गुरु १०८ ब.प्र.रविशंकर महाराज

खेड, १३ मे (वार्ता.) – तालुक्यातील आष्टी गावचे जागृत ग्रामदैवत श्री देव खेम सोमेश्वर मंदिराचा जीर्णोद्धार आणि कळशारोहण सोहळा, रायपाटण (ता. राजापूर) येथील महंत श्री गुरु १०८ ब.प्र. रविशंकर महाराज यांच्या शुभहस्ते भावपूर्ण वातावरणात साजरा झाला. त्यानंतर महाराजांनी उपस्थित भक्तगणांना मार्गदर्शन केले. या वेळी ध्वजारोहण, रुद्र अभिषेक, हवन, पालखी नृत्य, भजन, महाप्रसाद आदी कार्यक्रमांचे आयोजन करण्यात आले होते. या सोहळ्याला पंचक्रोशीतील भक्तगण मोठ्या संख्येने उपस्थित होते.

महंत श्री गुरु १०८ ब.प्र. रविशंकर महाराज म्हणाले, ‘‘आपल्या जीवनात धर्माचरणाचे अनन्य साधारण महत्त्व आहे. आपली परंपरा आपणच जपली पाहिजे. प्रत्येकाने धर्माचरण आणि नामजप हे केलेच पाहिजे. ‘देवळात येतांना देवाचा आशीर्वाद घेण्यासाठी येत आहोत’, असा भाव ठेवून देवळात देवदर्शनसाठी यावे. धर्माचरण आणि नामस्मरण केल्याने देवाचा आशीर्वाद प्राप्त होतो.’’