जिन्यामध्ये थुंकू नये म्हणून लावलेल्या देवतांच्या टाईल्स पोलीस प्रशासनाच्या साहाय्याने काढल्या !

हडपसर (जिल्हा पुणे) – येथील ‘वैशाली हाईट्स’ या इमारतीच्या जिन्यामध्ये लोकांनी थुंकू नये, म्हणून हिंदु देवतांच्या चित्र असलेल्या टाईल्स लावण्यात आल्या होत्या. यामुळे देवतांची विडंबना होत असल्याचे आणि काही ठिकाणी थेट थूंकलेले असल्याचे धर्मप्रेमींच्या निदर्शनास आले. याविषयी माहिती मिळताच स्थानिक हिंदुत्वनिष्ठ आणि धर्मप्रेमी यांनी तत्परतेने पावले उचलत, पोलीस प्रशासनाच्या साहाय्याने या सर्व टाईल्स काळजीपूर्वक काढून त्यांचे विधीवत् विसर्जन केले.

मार्च २०२६ मध्ये हडपसर येथे झालेल्या ‘हिंदु राष्ट्र-जागृती सभे’च्या नंतर स्थानिक भागात धर्मशिक्षणवर्ग चालू झाला आहे. या वर्गाच्या सामाजिक माध्यमांतील (सोशल मीडिया) समुहामध्ये सजग धर्मप्रेमी श्री. धीरज सूर्यवंशी यांनी या विडंबनाचा एक व्हिडिओ प्रसारित केला होता. हा व्हिडिओ पहाताच ‘हिंदु राष्ट्र समन्वय समिती’चे जिल्हा संयोजक श्री. सचिन घुले यांनी तातडीने गोरक्षक श्री. आबा बंडगर यांच्याशी संपर्क साधला.

या धर्मप्रेमींचा होता सहभाग

या यशस्वी मोहिमेमध्ये ‘हिंदु राष्ट्र समन्वय समिती’चे जिल्हा संयोजक श्री. सचिन घुले, श्री. आबा बंडगर, श्री. अनिकेत मांडे, श्री. धीरज सूर्यवंशी, श्री. यशराज काळे, श्री. बाबू काळे आणि श्री. आर्यन काळे यांचा सहभाग होता.