जगद्गुरु तुकाराम महाराज यांच्या पालखीचे ७ जुलै या दिवशी प्रस्थान !

पुणे – श्री क्षेत्र देहू येथील ‘जगद्गुरु तुकाराम महाराज संस्थान’च्या वतीने आषाढी वारीचे वेळापत्रक घोषित केले आहे. ७ जुलै या दिवशी पालखी सोहळा मुख्य देऊळवाड्यातून  पंढरपूरकडे प्रस्थान करील. पालखीचे यंदाचे ३४१ वे वर्ष आहे. यंदाच्या पालखी सोहळ्याचे विश्वस्त म्हणून ह.भ.प. विक्रमसिंह मोरे-देहूकर, ह.भ.प. उमेश मोरे आणि ह.भ.प. लक्ष्मण मोरे यांची निवड करण्यात आली.

१. १७ जुलै या दिवशी आषाढी एकादशीला पालखी पंढरपुरातील श्री विठ्ठल-रुक्मिणी मंदिरात येईल.

२. २९ जुलै या दिवशी पालखीचा परतीचा प्रवास चालू होऊन ९ ऑगस्ट म्हणजे एकादशीच्या दिवशी पालखी श्री क्षेत्र देहू येथे परत येईल.

३. गेल्या वर्षी पालखी सोहळ्यात ३९५ दिंड्या सहभागी होत्या. पालखी रथापुढे ३० आणि उर्वरित दिंड्या रथामागे असा त्यांचा क्रम होता.

४. पालखीतील रथासाठी आणि चौघडा गाडीसाठी संस्थानने ३ बैल जोडी खरेदी केली आहे.