Bangladesh Hindu Murder : बांगलादेशात हिंदु मिठाई व्यावसायिकाची मुसलमानांकडून हत्या

दुकानातील हिंदु कर्मचार्‍याला होत असलेली मारहाण थांबवतांना झाली हत्या

ढाका (बांगलादेश) – बांगलादेशातील गाझीपूर जिल्ह्यात लिटन चंद्र घोष या ५५ वर्षीय हिंदु मिठाई व्यावसायिकाची हत्या करण्यात आली. या दुकानात काम करणार्‍या कर्मचार्‍यावर आक्रमण झाले; म्हणून घोष ते रोखण्यासाठी मधे आल्यावर त्यांच्यावर फावड्याने वार करून त्यांना ठार मारण्यात आले. या वेळी जमावाने ३ आरोपींना तात्काळ पकडून पोलिसांच्या स्वाधीन केले.

लिटन चंद्र घोष यांचे बारानगर रोड भागात ‘बैसाखी स्वीटमीट अँड हॉटेल’ या नावाने दुकान आहे. १७ जानेवारीला सकाळी ११ वाजण्याच्या सुमारास मासूम मिया नावाचा एक मुलगा दुकानात आला. त्या वेळी दुकानात काम करणार्‍या अनंत दास या १७ वर्षांच्या कर्मचार्‍याशी मासूम याचा वाद झाला. या वादानंतर दोघांमध्ये शिवीगाळ आणि मारामारी चालू झाली. यानंतर मासूमचे वडील महंमद आणि आई माजेदा हे दोघेही तिथे पोचले. त्यांनीही मासूमसह अनंत दास याला मारायला चालू केले. या वेळी लिटन घोष हे अनंतला वाचवण्यासाठी मधे पडले, तेव्हा मासूम, महंमद आणि माजेदा या तिघांनी लिटन घोष यांच्यावर फावड्याने वार केले. या जखमा इतक्या गंभीर होत्या की, लिटन घोष यांचा जागीच मृत्यू झाला.