Afghan-Hindu Research Centre : कृषी संशोधनाला चालना देण्यासाठी भारत अफगाणिस्तानात ‘अफगाण हिंदु संशोधन केंद्र’ चालू करणार !

काबुल (अफगाणिस्तान) : कृषी संशोधनाला चालना देण्यासाठी भारत अफगाणिस्तानात ‘अफगाण हिंदु संशोधन केंद्र’ चालू करणार आहे. भारताचे राजनैतिक अधिकारी करण यादव आणि अफगाणिस्तानचे कृषी मंत्री अताउल ओमारी यांच्या झालेल्या भेटीत हा निर्णय घेण्यात आल्याचे समजते.

ओमारी म्हणाले की,

४ दशकांहून अधिक काळ अफगाणिस्तानवर हवामान पालटांचा गंभीर परिणाम होत आहे. दुष्काळ आणि पिकांवरील कीटक यांमुळे देशातील कृषी उत्पादनाचे प्रमाण अन् गुणवत्ता दोन्ही लक्षणीय प्रमाणात उणावले आहे. यावर उपाय म्हणून हवामान-प्रतिरोधक पीक जाती विकसित करण्यासाठी वैज्ञानिक संशोधनाची नितांत आवश्यकता आहे. या वेळी ओमारी यांनी भारतात कृषी आणि पशूधन उत्पादने निर्यात करणार्‍या अफगाणी व्यापार्‍यांना व्हिसा प्रक्रिया सुलभ करण्याचीही विनंती केली.

यावर यादव यांनी ‘अफगाण हिंदु संशोधन केंद्र’ चालू करण्याचे सुतोवाच केले, तसेच यासाठी प्रत्यक्ष आणि ऑनलाईन प्रशिक्षण कार्यक्रम आयोजित करण्याचे आश्वासन त्यांनी दिले. यासह ओमारी यांनी उपस्थित केलेल्या सर्व सूत्रांवर विचार करण्याचेही आश्वासन दिले.