Kangana Ranaut : भाजप खासदार आणि अभिनेत्री कंगना रणौत यांनी न्यायालयात मागितली क्षमा !

महिला शेतकर्‍याचा अवमान केल्याचे प्रकरण

भटिंडा (पंजाब) – वृद्ध महिला शेतकर्‍याविषयी सामाजिक माध्यमांमध्ये लिखाण केल्याकारणाने हिमाचल प्रदेशातील मंडी येथील भाजप खासदार आणि अभिनेत्री कंगना रणौत यांनी येथील न्यायालयात उपस्थित राहून क्षमा मागितली. न्यायालयात उपस्थित झाल्यानंतर त्यांनी प्रसारमाध्यमांशी बोलतांना सांगितले की, एक गैरसमज झाला आहे. माझा कुणाचाही अवमान करण्याचा हेतू नव्हता.

वर्ष २०२१ मध्ये देहली येथील शेतकर्‍यांच्या आंदोलनाच्या संदर्भात कंगना यांनी  भटिंडातील बहादुरगड जंडिया गावातील रहिवासी ८७ वर्षीय महिला शेतकरी महिंदर कौर यांना ‘आंदोलनात सहभागी होण्यासाठी प्रत्येकी १०० रुपये घेणारी महिला’, असे म्हणून लिखाण (पोस्ट) केले होती. महिंदर कौर यांनी या विरोधात न्यायालयात खटला प्रविष्ट केला.