२५ गरीब कुटुंबांना ‘दिवाळी कीट’ वाटप

जगदंबादेवीचे पुजारी रतनसिंह राठोड यांचे दातृत्व !

अक्कलकोट – समाजातील वंचित घटकांप्रती संवेदनशीलता जपत तोळणूर येथील जगदंबादेवीचे पुजारी रतनसिंह राठोड यांनी दिवाळी सणाच्या निमित्ताने २५ गरीब कुटुंबांना जीवनावश्यक वस्तूंच्या कीटचे वाटप करून त्यांच्या आयुष्यात प्रकाश फुलवला आहे.

अतीवृष्टी आणि महापूर यांमुळे अनेक शेतकरी आणि कामगारवर्ग संकटात असतांना, राठोड यांनी स्वतःच्या मर्यादित उत्पन्नातून हा सामाजिक उपक्रम राबवला. ‘मी गरीब कुटुंबात जन्मलो आहे. माझ्यापेक्षाही अनेक कुटुंबे अत्यंत गरिबीत जीवन जगतात. त्यांच्या झोपडीतही दिवाळीचा दिवा लागावा, या भावनेतून मी हा उपक्रम हाती घेतला’, असे राठोड यांनी सांगितले.

तोळणूर, जेऊरवाडी आणि अक्कलकोट स्थानक परिसरातील अत्यंत गरीब कुटुंबांना साखर, तेल, रवा, डाळी, हरभरा, फुटाणे, खोबरे आदी वस्तूंचे ७ किलो एवढे दिवाळी कीट देण्यात आले. या उपक्रमात श्रीमंत राठोड, संदीप राठोड, संतोष राठोड, काशीनाथ राठोड, नामदेव राठोड, अक्षय राठोड, सुभाष चव्हाण आदी मान्यवर सहभागी झाले होते.

गरिबीशी झुंज देत स्वतः श्रम करून उपजीविका करणार्‍या राठोड यांनी दाखवलेल्या या दातृत्वाचे समाजात कौतुक होत आहे. अशा पुजार्‍यांमुळे देवळाचेच नव्हे, तर सामाजिक सेवेचे पावित्र्य वृद्धींगत झाले आहे.