Vikram 3201 : भारताची अंतराळात वापरण्यायोग्य पहिली सेमीकंडक्टर चिप ‘विक्रम ३२०१’चे अनावरण !

उपग्रह मोहिमांमध्ये होणार उपयोग

नवी देहली – इलेक्ट्रॉनिक्स आणि माहिती तंत्रज्ञान मंत्री अश्‍विनी वैष्णव यांनी ‘सेमिकॉन इंडिया २०२५’ परिषदेत पंतप्रधान नरेंद्र मोदी यांना ‘विक्रम ३२०१’ ही भारताची पहिली सेमीकंडक्टर चिप सादर केली. भारताच्या सेमीकंडक्टर स्वावलंबनाच्या दिशेने हे एक ऐतिहासिक पाऊल आहे. हा ‘प्रोसेसर’ भारतीय अंतराळ संशोधन संस्था ‘इस्रो’ आणि चंदीगड येथील सेमीकंडक्टर प्रयोगशाळा यांच्या सहकार्याने विकसित करण्यात आला आहे.

‘विक्रम ३२०१’संदर्भात विशेष काय ?

हा ३२-बिट मायक्रोप्रोसेसर आहे, जो विशेषतः अंतराळ मोहिमांच्या कठोर परिस्थितीत काम करण्यासाठी बनवण्यात आला आहे. उणे ५५ अंश सेल्सिअस ते १२५ अंश सेल्सिअस तापमान सहन करण्याची त्याची क्षमता आहे. चिप उपग्रह आणि प्रक्षेपण वाहनांमध्ये दिशादर्शन अन् नियंत्रण व्यवस्थापन हाताळण्यासाठी बनवण्यात आली आहे. सैनिकी दर्जाच्या मानकांनुसार ती बनवण्यात आली आहे, जेणेकरून किरणोत्सर्ग आणि कंपन यांसारख्या कठीण परिस्थितीतही ती काम करत राहील.