‘Mangalam Kapoor’ : ‘मंगलम् कापूर’च्या विज्ञापनात प्रभु श्रीरामाचे मानवीकरण करून विडंबन !

मुंबई – ‘मंगलम् कापूर’ नावाच्या प्रसिद्ध आस्थापनाने त्याच्या विज्ञापनामध्ये श्रीरामाची भूमिका करणारे एक पात्र ग्राहक म्हणून दाखवून प्रभु श्रीरामाचे मानवीकरण केले आहे. यात विज्ञापनात प्रभु श्रीरामाचे पात्र बूट घालून दुकानात येते. त्यापूर्वी एक जण त्याच्या पाया पडतो. त्यानंतर ते पात्र त्या व्यक्तीला टाळी देते, तसेच त्याला आशीर्वाद देते. (केवळ स्वतःच्या उत्पादनाची विक्री वाढावी आणि जनतेत विज्ञापानाची चर्चा व्हावी, या उद्देशाने प्रभु श्रीरामाच्या पात्राचे अशा प्रकारे मानवीकरण करणे, हे चुकीचे आहे. त्यामुळे देवतेचा अवमान होतो ! – संपादक)

(वरील विज्ञापन प्रसिद्ध करण्यामागे कुणाच्याही धार्मिक भावना दुखावण्याचा हेतू नाही. माहितीसाठी हे विज्ञापन प्रसिद्ध केले आहे. – संपादक )

१. या विज्ञापनात चित्रपटगृहाबाहेर प्रभु श्रीरामाचा वेश धारण केलेली ही व्यक्ती दाखवली आहे. हे पात्र भ्रमणभाषवर मानवाप्रमाणे ‘सेल्फी’ (स्वतःचेच छायाचित्र) काढत असतांना त्याच्या आईचा भ्रमणभाष येतो आणि आईने कापूर आणायला सांगितल्याची त्याला आठवण होते.

२. त्या वेळी सायकलचा वापर करून हे पात्र पूजासामग्री मिळणार्‍या दुकानात जाते. (बूट घालणे, भ्रमणभाषचा वापर करणे, सायकल वापरणे या सर्व मानवाच्या कृती देवाला करतांना दाखवणे हे योग्य नव्हे, हे हिंदूंना लक्षात येईल तो सुदिन ! – संपादक)

३. दुकानातील श्रद्धाळू मालक त्या व्यक्तीला प्रत्यक्ष ‘श्रीराम’ संबोधून ‘देवासाठी केवळ मंगलम् कापूर’ असे म्हणत इतर अन्य डबीऐवजी तिजोरीतून काढून मंगलम् कापराची मोठी डबी त्याला देतो. (या विज्ञापनातील दुकानाचा मालक प्रभु श्रीरामाची वेशभूषा केलेल्या पात्राचा मान ठेवत असला, तरी ‘देवतेचे मानवीकरण करणे म्हणजे देवतेचे विडंबनच होय’, हे लक्षात घेतले पाहिजे ! – संपादक)