श्री बालाजीच्या कृपेने ‘सनातन राष्ट्र शंखनाद महोत्सव’ निर्विघ्नपणे पार पडल्याने श्रीचित्‌शक्ति (सौ.) अंजली मुकुल गाडगीळ यांनी त्याच्या चरणी केली भावपूर्ण कृतज्ञता व्यक्त !

श्री बालाजीच्या चरणी निमंत्रणपत्रिका अर्पण करतांना श्रीचित्‌शक्ति (सौ.) अंजली मुकुल गाडगीळ यांना आलेली अनुभूती

मे मासामध्ये मी श्री बालाजीच्या चरणी ‘सनातन राष्ट्र शंखनाद महोत्सवा’ची निमंत्रणपत्रिका चरणी ठेवण्यासाठी गेले होते. त्या वेळी महोत्सवाच्या निमंत्रणपत्रिकेवर श्री बालाजीची दृष्टी पडावी, अशा पद्धतीने मूर्तीसमोर प्रत्यक्ष धरली. त्या वेळी मला ‘क्षणभर श्री बालाजीची पापणी हलतांना जाणवली आणि मूर्तीमध्ये जिवंतपणा जाणवला अन् देवाने माझे म्हणणे ऐकले’, असे जाणवले. तिरुपती मंदिराच्या परिसरातच श्री बालाजीची आई श्री बकुळादेवी हिचेही मंदिर आहे. मी त्या ठिकाणीही महोत्सवाची निमंत्रणपत्रिका चरणी ठेवली. त्या वेळी माझ्या लक्षात आले की, कोणताही मुलगा आईचे ऐकतो. या भावाने मी डोळेबंद करून श्री बकुळादेवीला प्रार्थना केली, ‘सनातन राष्ट्र शंखनाद महोत्सव’ निर्विघ्नपणे पार पडू दे आणि आई तुझ्यासह श्री बालाजी असे दोघांनी या कार्यक्रमाला उपस्थित रहावे.’ ही प्रार्थना करतेवेळी डोळे बंद असतांना ‘देवीचा हिरव्या साडीचा पदर निमंत्रणपत्रिकेवर पांघरला गेला. तिने आम्हाला आशीर्वादाच्या मायेची ऊब दिली’, असे जाणवले. मी डोळे उघडले, तेव्हा देवीने हिरवी साडी नेसलेली होती, हे दिसले. यातून देवीने महोत्सव निर्विघ्न पार पडण्याविषयी आणि उपस्थित रहाण्याविषयी आशीर्वाद दिला, असे जाणवले.