सनातन प्रभात > Post Type > बातम्या > आंतरराष्ट्रीय बातम्या > US Indians Deportation : गेल्या ६ महिन्यांत अमेरिकेतून भारतियांना परत पाठवण्याचे प्रमाण २६७ टक्क्यांनी वाढले !

US Indians Deportation : गेल्या ६ महिन्यांत अमेरिकेतून भारतियांना परत पाठवण्याचे प्रमाण २६७ टक्क्यांनी वाढले !

डॉनल्ड ट्रम्प यांच्या कार्यकाळात स्थलांतराची धोरणे झाली अधिक कठोर !

नवी देहली – डॉनल्ड ट्रम्प यांनी जानेवारी २०२५ मध्ये अमेरिकी राष्ट्राध्यक्षपदाची सूत्रे हाती घेतली. त्यानंतर स्थलांतरितांचे धोरण अत्यंत कठोर करण्यात आल्याने गेल्या ६ महिन्यांत भारतियांना मोठ्या प्रमाणात परत पाठवण्यात येत आहे. आकडेवारीचा विचार करता माजी राष्ट्राध्यक्ष जो  बायडेन यांच्या कार्यकाळात प्रतिदिन साधारण ३ भारतियांना परत पाठवण्यात येत असे. आता हे प्रमाण ८ वर पोचले आहे. टक्केवारीचा विचार करता ही २६७ टक्क्यांची वाढ आहे.

भारताच्या परराष्ट्र मंत्रालयाने सांगितले की,

१. जानेवारी २०२० ते जुलै २०२५ या साडेपाच वर्षांच्या कालावधीचा विचार करता एकूण ७ सहस्र २४४ भारतीय नागरिकांना विविध कारणांमुळे अमेरिकेतून भारतात पाठवण्यात आले. ट्रम्प यांच्या कार्यकाळाचा, म्हणजेच जानेवारी २०२५ पासूनचा विचार केला, तर ही संख्या १ सहस्र ७०३ आहे. ही संख्या एकूण साडेपाच वर्षांच्या संख्येच्या तुलनेत जवळपास २५ टक्के आहे.

२. राज्यनिहाय भारतात परत पाठवण्याची आकडेवारी पहाता पंजाब आणि हरियाणा या २ राज्यांतूनच अनुक्रमे ६२० आणि ६०४ भारतियांना अमेरिकेतून परत पाठवण्यात आले. यानंतर गुजरातचा क्रमांक लागतो. २५४ गुजरातींना अमेरिकेने परत पाठवले. गोव्यातील २६, तर महाराष्ट्रातील २० लोकांना गेल्या ६ महिन्यांत परत पाठवले गेले.

नूतन लेख