Bangladeshi Smugglers Shot Dead  : बांगलादेश सीमेवर सैनिकांच्या प्रत्युत्तरादाखल गोळीबारात २ बांगलादेशी तस्कर ठार

१५ लाखांच्या औषधांची तस्करी करत सीमा ओलांडत होते

आगरतळा (त्रिपुरा) – दक्षिण त्रिपुराच्या सीमेलगतच्या भागात सीमा सुरक्षा दलाने भारतातून विविध वस्तूंची तस्करी करण्याचा प्रयत्न करणार्‍या बांगलादेशी तस्करांवर केलेल्या गोळीबारात २ जण ठार, तर १ जण घायाळ झाला. घायाळ झालेल्यावर रुग्णालयात उपचार चालू आहेत. जाकिर हुसेन मिल्लत आणि महंमद यासीन लिटन यांचा मृत्यू झाला, तर महंमद अफसर घायाळ झाला.

२६ जुलै या दिवशी हे तिघे सीमेवरून बांगलादेशात जात असतांना सैनिकांनी त्यांना हटकले. तेव्हा त्यांनी सैनिकांवर आक्रमण केले. या वेळी प्रत्युत्तरात सैनिकांनी केलेल्या गोळीबारात महंमद यासीन लिटन घटनास्थळीच ठार झाला, तर जाकिर हुसेन मिल्लत याचा रुग्णालयात उपचाराच्या वेळी मृत झाला. घटनास्थळावरून १५ लाख रुपयांच्या औषधांचा साठा जप्त करण्यात आला आहे.

भारतीय तस्करही अटकेत

त्रिपुरा पोलिसांचे साहाय्यक पोलीस महानिरीक्षक (कायदा आणि सुव्यवस्था) रणधीर देबबर्मा यांनी सांगितले की, या प्रकरणात २ भारतीय तस्करांनाही अटक करण्यात आली आहे. या तस्करांकडे चौकशी करून संपूर्ण तस्करी जाळ्याविषयी माहिती गोळा केली जात आहे.

सीमा सुरक्षा दलाने ठार झालेल्या बांगलादेशी तस्करांचे मृतदेह बांगलादेश सीमा सुरक्षा दलाकडे सोपवले आहेत. या वेळी कमांडंट स्तरावर ‘फ्लॅग मीटिंग’ही झाली, ज्यामध्ये बांगलादेशाच्या अधिकार्‍यांनी गोळीबाराविषयी चिंता व्यक्त केली. (बांगलादेशी तस्करांविषयी नव्हे, तर त्यांना रोखण्यासाठी भारताच्या सीमा सुरक्षा दलाने केलेल्या गोळीबारावर चिंता व्यक्त करणारे बांगलादेशी अधिकारी ! अशा उद्दाम अधिकार्‍यांना धडा शिकवणे आवश्यक ! – संपादक)  

तस्करी सहन केली जाणार नाही ! – भारत

भारतीय सीमा सुरक्षा दलाने स्पष्टपणे सांगितले की, भारत-बांगलादेश सीमावर तस्करी कोणत्याही परिस्थितीत सहन केली जाणार नाही. जर सुरक्षा दलांवर आक्रमण झाले, तर आत्मरक्षणात प्रत्युत्तर देणे अपरिहार्य होते.

 सीमेवर वाढवण्यात आला बंदोबस्त

या घटनेनंतर सीमा सुरक्षा दलाने सीमा भागांत गस्त अधिक तीव्र केली आहे. अधिकार्‍यांनी सांगितले की, आंतरराष्ट्रीय सीमेसंदर्भात भारताची नीती ‘शून्य सहिष्णुता’ आहे. तस्करीवर नियंत्रण ठेवण्यासाठी लवकरच ड्रोन, नाईट व्हिजन कॅमेरे (रात्रीच्या अंधारात पहाता येणारे कॅमेरे)आणि अतिरिक्त गस्त यांचीही व्यवस्था करण्यात येत आहे.