गोव्यात २४ जुलैपर्यंत मध्यम पावसाची शक्यता

पणजी, १८ जुलै (वार्ता.) – १८ जुलै ते २४ जुलै या कालावधीत गोव्यातील बहुतांश ठिकाणी मध्यम स्वरूपाचा पाऊस पडेल, असा अंदाज हवामान खात्याने वर्तवला आहे. या ७ दिवसांच्या कालावधीत मध्यम पावसाची शक्यता असून कोणत्याही जिल्ह्यासाठी हवामान खात्याने कोणतीही गंभीर चेतावणी दिलेली नाही; मात्र विशेषतः सखल आणि पूरप्रवण भागातील रहिवाशांना सतर्क रहाण्याचा आणि हवामानाविषयक अद्ययावत माहिती पहाण्याचा सल्ला देण्यात आला आहे.

धारबांदोडा येथे २४ घंट्यांत सर्वाधिक ८२.४ मि.मी. पावसाची नोंद

हवामान खात्याने दिलेल्या माहितीनुसार, १८ जुलै या दिवशी सकाळी ८.३० वाजता संपलेल्या २४ घंट्यांच्या कालावधीत गोव्यामध्ये धारबांदोडा येथे सर्वाधिक ८२.४ मि.मी. पावसाची नोंद झाली. केपे (६०.२ मि.मी.), सांखळी (५२.४ मि.मी.), फोंडा (५०.८ मि.मी.), सांगे (४८.५ मि.मी.) आणि जुने गोवे (२२.६ मि.मी.) या ठिकाणी मध्यम स्वरूपाचा पाऊस झाला. पेडणे (९.६ मि.मी.), मडगाव (८.६ मि.मी.), दाबोळी (७.८ मि.मी.), काणकोण (७.४ मि.मी.), म्हापसा (६.२ मि.मी.) आणि पणजी (४.६ मि.मी.) मुरगाव (२.२ मि.मी.) याप्रमाणे अल्प प्रमाणात पावसाची नोंद झाली. या कालावधीत राज्यातील कोणत्याही केंद्रावर अतीवृष्टी किंवा अत्यंत मुसळधार पावसाची नोंद झाली नाही.

वेळुस, सत्तरी येथे मुसळधार पावसामुळे शेती आणि बागायती यांची हानी

वाळपई – सत्तरी तालुक्यात वेळूस परिसरात १७ जुलैच्या अवघ्या एका रात्रीत झालेल्या मुसळधार पावसामुळे शेती आणि बागायती यांची मोठी हानी झाली आहे. सततच्या पावसामुळे शेतांमध्ये गुडघाभर पाणी साचले आहे आणि सुपारीच्या बागायती पाण्याखाली गेल्या आहेत. यांमुळे पिकांची मोठी हानी झालेली आहे. स्थानिक शेतकरी रामा गावकर म्हणाले, ‘‘एका रात्रीत झालेल्या पावसामुळे येथील परिस्थिती गंभीर बनली आहे.’’