Obama : अमेरिकेचे सरकार लोकशाहीला दुर्बल करत आहे !

अमेरिकेचे माजी राष्ट्राध्यक्ष बराक ओबामा यांची ट्रम्प सरकारवर टीका

वॉशिंग्टन (अमेरिका) – आज जे लोक अमेरिकेचे सरकार चालवत आहेत, ते लोकशाहीच्या मूलभूत तत्त्वांना दुर्बल करत आहेत. लोकशाहीमध्ये सरकारमध्ये आतून आणि बाहेरून चुकीच्या गोष्टींना विरोध असणे महत्त्वाचे आहे; पण आता तसे होतांना दिसत नाही, अशी टीका अमेरिकेचे माजी राष्ट्राध्यक्ष बराक ओबामा यांनी नुकतेच केले.

ते अमेरिकेतील कनेक्टिकट राज्यातील हार्टफोर्ड शहरातील एका कार्यक्रमात बोलत होते. ओबामा यांनी अमेरिकेची तुलना हंगेरीसारख्या देशांशी केली, जिथे निवडणुका होतात; पण लोकांच्या आवाजाचा आदर राखला जात नाही आणि नेते मनमानी पद्धतीने वागतात. ओबामा यांनी चेतावणी देतांना म्हटले की, ‘अमेरिकाही अशाच मार्गावर जात आहे, जिथे कायदा आणि लोकशाही यांची खरी भावना दुर्बल होत आहे.’ ओबामा यांनी वर्ष २०२० मध्ये झालेल्या अध्यक्षीय निवडणुकीचे उदाहरण दिले, ज्यामध्ये बायडेन जिंकले; परंतु पराभूत झालेल्या डॉनल्ड ट्रम्प यांनी फसवणुकीचे खोटे आरोप केले.