‘ऑपरेशन सिंदूर’ची माहिती पुरवणार्‍या पाकिस्तानी गुप्तहेराला पंजाबमध्ये अटक !

अमृतसर (पंजाब) – भारतीय सैन्य ‘ऑपरेशन सिंदूर’ राबवत असतांना त्याविषयीची संवेदनशील माहिती पाकिस्तानी गुप्तचर संघटनेला पुरवल्याच्या प्रकरणी राज्यातील तरन तरण जिल्ह्यातून गगनदीप सिंह याला अटक करण्यात आली आहे. पोलिसांनी त्याच्याकडील भ्रमणभाषही कह्यात घेतला असून, त्याद्वारे ही माहिती पाठवली जात असावी, असा अंदाज पोलिसांनी वर्तवला आहे.

१. ऑपरेशन सिंदूरच्या काळात भारतीय सैन्य ज्या ठिकाणी तैनात होते, तेथील माहिती गगनदीप याने पाकिस्तानी यंत्रणेला पुरवली होती.

२. मागील ५ वर्षांपासून गगनदीप सिंह हा खलिस्तानी आतंकवादी गोपाल सिंह चावला याच्या संपर्कात होता. त्याच्याच माध्यमातून गगनदीप सिंग हा पाकिस्तानी गुप्तचर संघटनेच्या संपर्कात आला.

३. गगनदीप याच्या भ्रमणभाषमध्ये पाकिस्तानला पुरवण्यात आलेली माहिती सापडली असून त्याचसमवेत पाकिस्तानी गुप्तरचर संघटना ‘इंटर इंटेलिजन्स सर्व्हिस’ अर्थात् आय.एस्.आय.शी निगडित किमान २० व्यक्तींचे भ्रमणभाष क्रमांकही सापडले आहेत.