जैन तीर्थंकर प्रतिमा विटंबनेचा अल्पसंख्यांक आयोगाने घेतला आढावा !

सांगली, १ मे (वार्ता.) – जिल्ह्यातील कुंडल येथील जैन तीर्थ क्षेत्रावरील भगवान पार्श्वनाथांची प्रतिमा आणि पद्मावतीदेवीची प्रतिमा यांची विटंबना केल्याच्या प्रकरणाचा ‘जैन अल्पसंख्यांक आर्थिक विकास महामंडळा’चे अध्यक्ष आणि महाराष्ट्र राज्य अल्पसंख्यांक आयोगाचे सदस्य ललित गांधी यांनी बैठकीत आढावा घेतला.

कुंडल येथील मंदिरात समाजकंटकांनी भगवान पार्श्वनाथांच्या मूर्तींची तोडफोड केल्याचा प्रकार उघडकीस आला होता. या पार्श्वभूमीवर बैठक आयोजित केली होती. जिल्हा पोलीस प्रमुख यांनी अन्वेषणासाठी विशेष पथक गठीत करून अन्वेषण करावे, अद्ययावत् तंत्रज्ञानाचे साहाय्य घेऊन या प्रकरणाचे सखोल अन्वेषण करावे, अशा सूचना गांधी यांनी दिल्या. तीर्थक्षेत्राचा ‘अ’ वर्ग पर्यटनस्थळांमध्ये समावेश करण्यासाठी प्रस्ताव सिद्ध करावा. त्याच्या विकासासाठी जिल्हा नियोजन समितीमधून निधी मिळावा. पर्यटनस्थळी सोयी-सुविधा उपलब्ध करून द्याव्यात, असे त्यांनी  स्पष्ट केले.