SANATAN PRABHAT EXCLUSIVE : राज्यातील धर्मादाय रुग्णालयांचा ‘सवलत घोटाळा’ उघड !

श्री. प्रीतम नाचणकर, मुंबई

मुंबई – गरीब आणि आर्थिकदृष्ट्या दुर्बल रुग्णांवर विनामूल्य किंवा सवलतीच्या दरात उपचार करावेत, यासाठी सरकार धर्मादाय रुग्णालयांना प्रत्येक मासाला लाखो रुपयांच्या सवलती देते. या बदल्यात धर्मादाय रुग्णालयांनी गरीब आणि निर्धन रुग्णांना विनामूल्य किंवा सवलतीच्या दरात उपचार देणे कायद्याने बंधनकारक आहे. राज्यातील अनेक धर्मादाय रुग्णालयांनी जिल्ह्याजिल्ह्यांमध्ये त्याच ट्रस्टची आणि त्याच नावाने रुग्णालये चालू केली आहेत. ही सर्व रुग्णालये सरकारकडून प्रत्येक मासाला मिळणार्‍या कोट्यवधी रुपयांच्या सवलती घेत आहेत; मात्र त्यांचा लाभ गरीब आणि निर्धन रुग्णांना दिला जात नाही. महाराष्ट्रातील अनेक नामांकित रुग्णालयांमध्येही असा भ्रष्टाचार चालू आहे.

धर्मादाय रुग्णालयासंदर्भात शासनाने काढलेले आदेश –

हे लक्षात आल्यावर सरकारच्या विधी आणि न्याय विभागाकडून राज्यातील २ रुग्णालयांना नोटीस देण्यात आली आहे. यामध्ये पुणे येथील एका रुग्णालयाचा समावेश आहे. इतर जिल्ह्यांमध्येही ‘गरीब-निर्धन रुग्णांना सवलत दिली जात आहे का ?’, याची पडताळणी सरकारकडून चालू करण्यात आली आहे.

Massive corruption in the ‘provisions’ given to the charitable hospitals across Maharasthra State.

• Government robbed off in Crores every month.

• Misuse of ‘Provisions’ by establishing multiple hospitals through the same trust.

• The poor are deprived of the benefits of… pic.twitter.com/foFspPWjhN

— Sanatan Prabhat (@SanatanPrabhat) June 22, 2024

एका रुग्णालयाचा ८ कोटी रुपये आयकर (इन्कम टॅक्स) वाचला !

गरीब रुग्णांना सवलत देण्यासाठी धर्मादाय रुग्णालयांना आयकरात (इन्कम टॅक्समध्ये) सवलत दिली जाते. या सवलतीमुळे राज्यातील एका धर्मादाय रुग्णालयाची एका वर्षाला ८ कोटी रुपये इतक्या आयकराची (इन्कम टॅक्सची) बचत झाली आहे, अशी माहिती विधी आणि न्याय विभागाच्या एका अधिकार्‍याने दिली. यावरून धर्मादाय रुग्णालये सरकारकडून सवलती घेऊन मोठ्या प्रमाणात लाभ मिळवत असल्याचे उघड होत आहे.

सरकारकडून कोट्यवधी रुपयांच्या सवलती घेऊन गरिबांना त्याचा लाभ न देणार्‍या रुग्णालयांचा भ्रष्टाचार जाणा !  

राज्यातील निर्धन-गरीब रुग्णांना विनामूल्य आणि सवलतीच्या दरात उपचार द्यावेत, यासाठी महाराष्ट्र सरकारने धर्मादाय रुग्णालयांना कोट्यवधी रुपयांच्या भूमी अगदी नाममात्र रकमेत दिल्या आहेत. यासह धर्मादाय रुग्णालयांना त्यांच्या आयकरात ३० टक्के सवलत दिली जाते. यामुळे वर्षभरात या धर्मादाय रुग्णालयांचा कोट्यवधी रुपयांचा निधी वाचतो. यासह वीज आणि पाणी यांच्या देयकामध्येही सरकारकडून धर्मादाय रुग्णालयांना सवलत दिली जाते. धर्मादाय रुग्णालयांना रुग्णांकडून मिळणार्‍या एकूण मिळकतीमधील २ टक्के निधीतून निर्धन रुग्णांसाठी १० टक्के खाटा राखून ठेवून त्यांना विनामूल्य उपचार देणे, तर गरीब रुग्णांसाठी १० टक्के खाटा राखून ठेवून त्यांना ५० टक्के दरात उपचार देणे बंधनकारक आहे. त्यासाठी सरकारने ‘महाराष्ट्र सार्वजनिक विश्‍वस्त व्यवस्था अधिनियम १९५०’ हा कायदाही केला आहे.

असे आहे योजनेचे स्वरूप !

सरकारकडून सवलत घेणार्‍या रुग्णालयाला गरिबांसाठी सवलत देणे बंधनकारक !

एखाद्या धर्मादाय रुग्णालयाला सरकारकडून भूमी दिली गेली नसली, तरी आयकर, वीज-पाणी देयक यांमध्ये सवलत दिली जाते, तसेच रुग्णालयांनी अन्य शाखा स्थापन केली आणि ती त्याच नावाने असेल किंवा मूळ रुग्णालयातून प्राप्त झालेल्या नफ्याचा निधी त्यात वापरला गेला असेल, तर त्या रुग्णालयामध्ये गरीब-निर्धन रुग्णांना सवलतीत सेवा देणे बंधनकारक आहे, असे विधी आणि न्याय विभागातील एका अधिकार्‍याने सांगितले.