रामनाथी (गोवा) येथील सनातनच्या आश्रमात केलेल्या चंडीयागाच्या वेळी साधिकेला आलेल्या अनुभूती

१. आध्यात्मिक त्रास अल्प होणे

‘नवरात्रीच्या कालावधीत ७.१०.२०१९ या दिवशी चंडीयाग झाला. त्या वेळी मी पूर्णवेळ यज्ञाला बसले होते. तेव्हा मला होणारा आध्यात्मिक त्रास अल्प झाला.

२. देवीने वाईट शक्तींशी सूक्ष्मातून लढण्यासाठी आध्यात्मिक स्तरावर बळ देणे

अ. यज्ञ चालू असतांना ‘देवीने वाईट शक्तींशी लढण्यासाठी सूक्ष्मातून शक्ती दिली. त्यामुळेच मी त्रासाशी लढू शकत आहे’, असे मला जाणवले.

आ. माझ्या मनात ‘आता मी वाईट शक्तींच्या त्रासाला बळी न पडता त्यांच्याशी लढू शकेन’, असा विचार आला आणि ‘माझी साधना अन् माझे आयुष्य यांमध्ये येणारे अडथळे दूर होतील’, असे मला जाणवले.

३. यज्ञकुंडात कोहळ्यांचा बळी देतांना साधकांना त्रास देणार्‍या वाईट शक्ती कोहळ्यात आकृष्ट होत असल्याचे जाणवणे

यज्ञाच्या शेवटी कोहळ्यांचा बळी देण्यात आला. तेव्हा कोहळा फोडून त्याचे दोन तुकडे करण्यात आले आणि त्याच्या पृष्ठभागावर कुंकू घालण्यात आले. त्या वेळी ‘माझ्या डोळ्यांमधून सरडे आणि पालींप्रमाणे दिसणारे प्राणी त्या कोहळ्यात आकृष्ट होत आहेत’, असे मला दिसले. नंतर असंख्य संख्येने वेगवेगळ्या रूपातील सरपटणारे प्राणी कोहळ्याच्या दिशेने आकृष्ट होतांना दिसले, तसेच ‘साधकांना त्रास देणार्‍या वाईट शक्तीच त्या कोहळ्यात आकृष्ट होत आहेत’, असे मला जाणवले.’

– एक साधिका , सनातन आश्रम, रामनाथी, गोवा. (८.१०.२०१९)