कोकण रेल्वेमार्गावर भावनगर- कोचुवेल्ली रेल्वेगाडी ‘एल्.एच्.बी.’ अत्याधुुनिक डब्यांसह धावणार !

मुंबई – कोकण रेल्वेमार्गावर धावणारी ‘१९२६०/१९२५९ भावनगर- कोचुवेल्ली- भावनगर’ या रेल्वेगाडीत आता आरामदायक आणि अत्याधुनिक तंत्रज्ञानावर आधारित एल्.एच्.बी. (लिंक हॉफमॅन बुश) डबे (कोच) असणार आहेत. ही गाडी २० डिसेंबरपासून नव्या लाल-पांढर्‍या रूपासह धावेल. सध्या ही गाडी जुन्या प्रकारच्या ‘आय.आर्.एस्.’ या तंत्रज्ञानावर आधारित डब्यांसह चालवण्यात येते. नव्या तंत्रज्ञानामुळे या रेल्वेगाडीच्या डब्यांच्या रचनेतही पालट करण्यात आले आहेत.

एल्.एच्.बी. डब्याची वैशिष्ट्ये !

एल्.एच्.बी. कोच प्रवाशांच्या दृष्टीने सुरक्षित आणि प्रशस्त अशा अत्याधुनिक तंत्रज्ञानाने सुसज्ज आहे.
सक्षम, परंतु वजनाने हलके असल्यामुळे रेल्वेगाडीचा वेगही वाढतो.
इतर डब्यांच्या तुलनेत या डब्याची लांबी अधिक असल्याने त्यात ‘स्लीपर’ आणि ‘थ्री टायर एसी’ डब्यात ८ बर्थ, तर ‘टू टायर एसी’ डब्यात ४ बर्थ अधिक बसतात.
या डब्यांचा अपघात झाल्यास डबे एकमेकांवर चढत नाहीत. परिणामी अल्प जीवितहानी होते.
आधुनिक स्वरूपाची प्रसाधने वापरण्यात आली आहेत.