बँकेच्या महिला व्यवस्थापकाने दाखवलेल्या धाडसामुळे चोराला पकडण्यात यश !

बँकेचे किमान ३० लाख रुपये वाचले

श्रीगंगानगर (राजस्थान) – येथील मरुधरा ग्रामीण बँकेवर १५ ऑक्टोबरच्या सायंकाळी एका चोराने दरोडा टाकण्याचा प्रयत्न केला. चोर हातात चाकू घेऊन बँकेत शिरला आणि कर्मचार्‍यांना जिवे मारण्याची धमकी देऊन रोकड बॅगेमध्ये भरण्यास सांगू लागला. त्या वेळी बँकेच्या महिला व्यस्थापक (मॅनेजर) पूनम गुप्ता यांनी धाडसाने त्या चोराचा सामना केला. गुप्ता यांची आक्रमकता पाहून चोर हतबल झाला. त्यामुळे कर्मचार्‍यांनीही धाडस दाखवून या चोराच्या मुसक्या आवळल्या. पोलिसांनी चोराला अटक केली असून पूनम गुप्ता यांच्या धाडसाचे सर्वत्र कौतुक होत आहे.

ही घटना घडली तेव्ही बँकेत एकही सुरक्षारक्षक नव्हता. सामान्यतः या बँकेत प्रतिदिन ५० ते ७० लाख रुपयांचा व्यवहार होतो. घटना घडली त्यावेळीही बँकेत ३० ते ४० लाख रुपयांची रोकड उपलब्ध होती.