आर्यन खान याच्या सुटकेचे वृत्तसंकलन करण्यासाठी प्रसारमाध्यमांच्या प्रतिनिधींची आर्थर रोड कारागृहाबाहेर झुंबड

मुंबई, ३० ऑक्टोबर (वार्ता.) – अमली पदार्थ बाळगल्याच्या प्रकरणी अटकेत असलेल्या आर्यन खान याची ३० ऑक्टोबर या दिवशी जामिनावर सुटका झाली. सकाळी ११.३० वाजता आर्यन खान याला कारागृहाच्या बाहेर सोडण्यात आले; मात्र त्याच्या सुटकेचे वृत्तसंकलन करण्यासाठी प्रसारमाध्यमांच्या प्रतिनिधींनी पहाटे ५ वाजल्यापासून आर्थर रोड कारागृहाच्या बाहेर गर्दी केली होती. त्यामुळे प्रसारमाध्यमांचे प्रतिनिधी आणि अभिनेते शाहरुख खान यांचे चाहते यांना थोपवण्यासाठी कारागृहाबाहेर पोलिसांचा पहारा वाढवण्याची वेळ आली. प्रसारमाध्यमांचे प्रतिनिधी आणि शाहरुख खान यांचे चाहते यांनी केलेल्या गर्दीमुळे वाहतुकीला अडथळा निर्माण झाला. यामध्ये युवकांचा भरणा अधिक होता. (वेळ वाया घालवणारी भारताची युवा पिढी ! – संपादक) आर्यन याची सुटका होताच त्याच्या घराबाहेर चाहत्यांनी फटाकेही फोडले. खान यांचा बंगला आणि कारागृह यांच्याबाहेर २९ अन् ३० ऑक्टोबर या दिवशी झालेल्या गर्दीचा अपलाभ उठवत भुरट्या चोरांनी पत्रकारांसह अनेकांचे भ्रमणभाष आणि पैशांची पाकिटे चोरली. यांपैकी ३ चोरांना पकडण्यात आले आहे.

राज्यातील समस्या संपल्याप्रमाणे प्रसारमाध्यमांकडून २८ दिवस आर्यन खान याच्या वृत्ताला सर्वाधिक प्रसिद्धी !

गेले २८ दिवस राज्यातील विविध समस्या मांडण्याऐवजी वृत्तवाहिन्यांनी आर्यन खान याच्या अटकेविषयी त्याच त्याच बातम्यांना प्रसिद्धी दिली. ‘आर्यन खान कारागृहात काय खातो आहे ?’, ‘आर्यन खान याला पाहून शाहरुख खान याला गहिवरून आले’, ‘आर्यन खान याला आणखी १ दिवस कारागृहातच रहावे लागणार’, ‘आर्यन खान याची दिवाळी कारागृहातच जाणार का ?’, आदी निरर्थक बातम्या वृत्तवाहिन्यांवर दाखवण्यात आल्या. यामुळे समाजाला काही दिशा तर मिळाली नाहीच; उलट या खान पिता-पुत्रांना प्रसिद्धी मिळाली आणि अमली पदार्थ बाळगणारे किंवा घेणारे यांचे उदात्तीकरण झाले. यातून समाजात चुकीचा संदेश गेला. कही वर्षांपूर्वी असाच प्रकार अभिनेते संजय दत्त यांच्या अटकेच्या संदर्भातही दिसून आला होता.