वास्को येथील अमर नाईक याची हत्या मुसलमान मुलीशी असलेल्या प्रेमप्रकरणातून झाल्याचा पोलिसांचा दावा !

वास्को, १९ जुलै (वार्ता.) – नवेवाडे, वास्को येथील अमर नाईक याची हत्या प्रेमप्रकरणातून करण्यात आल्याची माहिती उघडकीस आली आहे. या प्रकरणाची सूत्रे दुबई येथून हलवण्यात आल्याचा संशय आहे. अमर नाईक याचे एका मुसलमान मुलीवर प्रेम होते; परंतु हे प्रेमप्रकरण तिच्या भावाला आणि परिवाराला मान्य नव्हते. त्यातूनच अमरचा काटा काढण्यासाठी रवि शंकर यादव याच्या हाती सूत्रे सोपवण्यात आल्याची माहिती सूत्रांकडून मिळाली आहे. त्यासाठी ५ लाख रुपये देण्यात आल्याचे समजते. या प्रकरणातील मुख्य आरोपी अद्याप मोकाट असून तो दुबई येथे असल्याची माहिती समोर आली आहे. अमर नाईक हत्या प्रकरणातील आरोपी रवि शंकर यादव याला हणजुणे येथील त्याच्या भावाच्या हॉटेलमधून अटक करण्यात आली होती. रवि शंकर यादव याला सत्र न्यायालयाकडून ५ दिवसांची पोलीस कोठडी ठोठावण्यात आली आहे.