वाशिम येथे महिला पोलिसावर बलात्कार केल्याप्रकरणी पोलीस निरीक्षकावर गुन्हा नोंद !

जनतेचे रक्षण करणार्‍या पोलिसांनी महिला पोलिसावर बलात्कार करणे यांसारखी लज्जास्पद गोष्ट कोणती ? असे पोलीस अधिकारी पोलीस विभागाला कलंकच असल्याने सरकारने त्यांना बडतर्फ करून कायद्यानुसार कठोर शिक्षा केली पाहिजे !

वाशिम – नांदेड जिह्यातील अर्धापूर पोलीस ठाण्यातील पोलीस निरीक्षक विश्‍वकांत गुट्टे यांनी वाशिम येथे ३० मे या दिवशी महिला पोलीस हवालदारावर बलात्कार केल्याप्रकरणी त्यांच्यावर पोलिसांनी भारतीय दंड विधान संहिता कलम ३७६ अन्वये गुन्हा नोंद केला आहे. या प्रकरणी महिला पोलीस हवालदार यांनी येथील पोलीस ठाण्यात तक्रार दिली होती.

‘आरोपी गुट्टे हे वर्ष २००७ मध्ये मालेगाव पोलीस ठाण्यात पोलीस उपनिरीक्षक पदावर कार्यरत होते. त्यांच्याशी ओळख झाल्यावर त्याचा अपलाभ घेत ३० मे या दिवशी आरोपीने येथील माझ्या घरी येऊन बळजोरी करून बलात्कार केला’, असे पीडित महिला पोलीस हवालदार यांनी तक्रारीत म्हटले आहे. या प्रकरणाचे पुढील अन्वेषण पोलीस करत आहेत.