US Indians Deportation : अमेरिका १८ सहस्र भारतीय नागरिकांना देशाबाहेर काढणार !

न्यूयॉर्क (अमेरिका) – अमेरिकेचे राष्ट्राध्यक्ष डॉनल्ड ट्रम्प यांच्या प्रशासनाने वैध कागदपत्रांविना वास्तव्यास असलेल्या १८ सहस्र भारतीय नागरिकांना अमेरिकेबाहेर काढण्याची (सीमापार करण्याची) सिद्धता चालू केली आहे. संबंधितांना कायदेशीर बाजू मांडण्याचीही संधी मिळणार नाही.

अशांना देशाबाहेर पाठवण्यासाठी पुन्हा सैनिकी विमानांचा वापर केला जाणार आहे. कागदपत्रांविना वास्तव्यास असलेल्यांच्या शोधासाठी सरकारी यंत्रणा विविध ठिकाणी धाडी घालत आहेत. ज्यांच्याकडे वैध कागदपत्रे नाहीत; म्हणून सीमापार पाठवण्यात येणार आहे, अशा स्थलांतरितांसाठी एल् पासो आणि कॅलिफोर्निया येथे नवीन ‘ताबा केंद्रे’ उभारण्यात आली असून त्यांसाठी अनुमाने १६ सहस्र ५०० कोटी भारतीय रुपयांचा खर्च करण्यात आला आहे. या केंद्रांमध्ये अनुमाने १२ सहस्र स्थलांतरितांच्या रहाण्याची तात्पुरती व्यवस्था करण्यात आली आहे. अमेरिकेतील न्यूयॉर्क, टेक्सास, कॅलिफोर्निया आणि न्यू जर्सी येथे केलेल्या पहाणीत अशा भारतीय नागरिकांचे जीवन विस्कळीत झाल्याचे समोर आले आहे. ‘ताबा केंद्रां’मधील काही व्यक्तींशी गैरवर्तन झाल्याच्याही तक्रारी करण्यात आल्या आहेत.

🚨 𝐂𝐨𝐧𝐭𝐫𝐚𝐬𝐭 𝐭𝐡𝐚𝐭 𝐜𝐚𝐧𝐧𝐨𝐭 𝐛𝐞 𝐢𝐠𝐧𝐨𝐫𝐞𝐝!

The US is deporting around 18,000 undocumented Indian nationals, taking swift action against illegal immigration, with reports claiming they won't even get a chance to present a legal case. ✈️❌

𝐌𝐞𝐚𝐧𝐰𝐡𝐢𝐥𝐞,… pic.twitter.com/R9KnoH9Cwr

— Sanatan Prabhat (@SanatanPrabhat) July 19, 2026

वर्ष २०२५ मध्ये ३ सहस्र ५६७ भारतियांना अमेरिकेतून सीमापार करण्यात आले होते !

भारताच्या परराष्ट्र मंत्रालयाच्या माहितीनुसार वर्ष २०२५ मध्ये अमेरिकेतून ३ सहस्र ५६७ भारतीय नागरिकांना सीमापार करण्यात आले होते. जून २०२६ पर्यंत १ सहस्र ७६ भारतीय नागरिकांना भारतात परत पाठवण्यात आले आहे.

५ फेब्रुवारी २०२५ या दिवशी अमेरिकेने पहिल्यांदाच सैनिकी विमानाने १०४ भारतियांना अमृतसरला पाठवले होते. या वेळी अनेक लोकांना हातकड्या आणि पायात बेड्या घालण्यात आल्या होत्या. याची छायाचित्रे समोर आल्यानंतर देशभरात वाद निर्माण झाला. संसदेतही गदारोळ झाला होता.