६७ टक्के आध्यात्मिक पातळीच्या सौ. स्वाती शिंदे यांना बालसंत पू. वामन राजंदेकर यांच्या संदर्भात आलेली अनुभूती !

१. पू. वामन यांनी मनातील इच्छा जाणून सूक्ष्मातून घरी येऊन वास्तूशुद्धी केल्याचे जाणवणे

‘पू. वामन यांची आणि माझी आधीच्या जन्मांपासून ओळख आहे’, असे मला वाटते. ‘पू. वामन आमच्या घरी आल्यास त्यांच्या चरणस्पर्शाने वास्तूची शुद्धी होईल’, असे मला वाटायचे; पण ‘ते शक्य नाही’, हेही मला ठाऊक होते. एकदा पू. वामन ‘मला मनातून काहीतरी सांगत आहेत’, असे वाटले. मला सूक्ष्मातून दिसले, ‘आम्ही घरी सर्व सिद्धता केली आहे. सजावट केली आहे. रांगोळी काढली आहे. तोरणे लावली आहेत. सर्व जण संतांच्या आगमनाची वाट पहात आहेत. पू. वामन घरी आले. आम्ही दारातच पू. वामन यांची पाद्यपूजा केली. नंतर पू. वामन आई-वडिलांचा हात पकडून आनंदाने घरी आले.’ मी जणू उघड्या डोळ्यांनी ते अनुभवत होते.

२. ‘एखाद्याच्या मनातील भाव अन् तळमळ जाणून ते इच्छा पूर्ण करत असणे’, असे पू. वामन यांनी सूक्ष्मातून सांगणे

तेव्हा पू. वामन मला (मनातूनच) सांगत होते, ‘अगं, संतांना स्थुलाचे बंधन नसते. एखाद्याच्या मनातील भाव, तळमळ जाणून ते ती कसेही करून पूर्ण करतात.’’ त्यामुळे ‘स्थुलातून मी तिकडे येण्याची आवश्यकता नाही. मी सूक्ष्मातून तुझी इच्छा पूर्ण केली आहे.’

–  सौ. स्वाती शिंदे (पूर्वाश्रमीच्या कु. स्वाती गायकवाड) (२५.८.२०२०)

पू. वामन जणू रूप साजिरे श्रीहरिचे भासते ।

दुडुदुडु धावत येती पू. वामन ।
चाहुलीने त्यांच्या आनंदी होते मन ॥ १ ॥

छुमछुम वाजती पैंजण तयांचे ।
कारंजे उडती हृदयी आनंदाचे ॥ २ ॥

हास्य मुखावरी मोहक विलसते ।
रूप साजिरे श्रीहरिचे जणू भासते ॥ ३ ॥

शब्द न कळती परि असे अतिमधुर वाणी ।
तयांच्या अस्तित्व मात्रे हृदयी आमुच्या ॥
स्फुरती मंजुळ गाणी ॥ ४ ॥

– सौ. स्वाती शिंदे (पूर्वाश्रमीच्या कु. स्वाती गायकवाड), सनातन आश्रम, रामनाथी, गोवा. (२५.८.२०२०)