सांगली येथे भरधाव चारचाकीची अनेक वाहनांना धडक; चालक पसार

सांगली, १७ जून (वार्ता.) – येथील पुष्पराज चौकाकडून बसस्थानकाकडे जाणार्‍या रस्त्यावरील नटराज उपाहारगृहासमोरील मंदिराजवळ १६ जून या दिवशी दुपारी ४.३० वाजण्याच्या सुमारास ‘हिट अँड रन’चा थरारक प्रकार घडला. मिरजेकडून सांगलीच्या दिशेने येणार्‍या एका भरधाव चारचाकीच्या चालकाचे नियंत्रण सुटून ती विरुद्ध दिशेला आली. या गाडीने रस्त्याच्या कडेला उभ्या असलेल्या ३ ते ४ दुचाकी आणि एका सायकलीला जोरदार धडक दिली. या अपघातात वाहनांची मोठी हानी झाली असून सुदैवाने कोणतीही जीवितहानी झाली नाही. अपघातानंतर मोटारचालक वाहनासह पसार झाला. या घटनेची माहिती मिळताच विश्रामबाग पोलीस ठाण्याच्या कर्मचार्‍यांनी घटनास्थळी येऊन पंचनामा केला.