छायाचित्रे प्रसारित करण्याची धमकी देत विद्यार्थिनीवर अत्याचार करणार्‍या शिक्षकाला अटक !

जालना येथील घटना !

जालना – शहरातील एका नामांकित खासगी शाळेतील शिक्षकाने इयत्ता नववीत शिकणार्‍या एका विद्यार्थिनीवर लैंगिक अत्याचार केल्याचा प्रकार उघडकीस आला आहे. या प्रकरणी पोलिसांनी विकी शिंदे या नराधम शिक्षकाला अटक केली आहे. (शिक्षण क्षेत्राला काळिमा फासणार्‍या अशा शिक्षकांना कठोर शिक्षा करणे आवश्यक ! – संपादक) आरोपी शिक्षक सामाजिक माध्यमातून पीडित मुलीच्या संपर्कात आला होता. त्याने तिच्यावर मानसिक दबाव टाकून तिची काही खासगी छायाचित्रे मिळवली. ही छायाचित्रे सामाजिक माध्यमांवर प्रसारित करण्याची धमकी देत त्याने विद्यार्थिनीला ब्लॅकमेल केले आणि तिच्यावर लैंगिक अत्याचार केला. या त्रासाला कंटाळून अखेर पीडित मुलीने हा सर्व प्रकार स्वत:च्या कुटुंबियांना सांगितला.