Custodial Killings : पोलीस कोठडीत छळ करून पिता-पुत्राच्या मृत्यूस कारणीभूत ठरलेल्या ९ पोलिसांना मृत्यूदंड !

चेन्नई (तमिळनाडू) – मद्रास उच्च न्यायालयाच्या मदुराई खंडपिठाने वर्ष २०२० मध्ये सथानकुलम् कोठडी मृत्यू प्रकरणात दोषी ठरलेल्या तामिळनाडूतील ९ पोलिसांना मृत्यूदंडाची शिक्षा सुनावली आहे. न्यायालयाने या घटनेला अत्यंत दुर्मीळ आणि गंभीर स्वरूपाचा गुन्हा मानत ही कठोर शिक्षा दिली आहे.

🚨 Sathankulam Custodial Deaths Case

In a landmark verdict, Madurai Court sentences 9 policemen to death for the brutal torture & killing of father-son duo Jayaraj & Bennix (2020 lockdown).

🏥 Shockingly A Govt hospital doctor had cleared them “fit for remand” despite injuries… pic.twitter.com/2tJzi4GczH

— Sanatan Prabhat (@SanatanPrabhat) April 8, 2026

१. हा निर्णय ६ वर्षे चाललेल्या दीर्घ सुनावणीनंतर देण्यात आला. या प्रकरणाची सुनावणी प्रथम अतिरिक्त जिल्हा आणि सत्र न्यायाधीश जी. मुथुकुमारन् यांच्या न्यायालयात झाली. न्यायालयाने सर्व ९ आरोपींना हत्या आणि इतर संबंधित कलमांखाली दोषी ठरवले. या निर्णयात न्यायालयाने नमूद केले की, हा प्रकार अत्यंत क्रूर आणि सत्तेच्या अपवापराचे उदाहरण आहे.

२. केंद्रीय अन्वेषण विभागाने केलेल्या अन्वेषणात पोलिसांनी केलेला अत्याचार पूर्वनियोजित होता आणि तो रात्रभर चालला होता, असे निष्पन्न झाले. अन्वेषण विभागाने न्यायालयात युक्तीवाद केला की, आरोपींनी जाणीवपूर्वक असे अमानुष कृत्य केले. त्यामुळे त्यांना कमाल शिक्षा दिली जावी. न्यायालयाने हा युक्तीवाद मान्य केला.

काय आहे प्रकरण ? तूतीकोरिन जिल्हातील सथानकुलम् येथील पी. जयराज आणि त्यांचा मुलगा जे. बेन्निक्स यांचा पोलीस कोठडीत मृत्यू झाला होता. दोघांना १९ जून २०२० या दिवशी कोरोना महामारीच्या काळात लागू केलेल्या दळणवळण बंदीच्या नियमांचे उल्लंघन केल्याच्या आरोपाखाली कह्यात घेण्यात आले होते. त्यांचे भ्रमणभाषचे दुकान होते. ते ठरलेल्या वेळेनंतरही उघडे असल्याचा आरोप होता. चौकशीत उघड झाले की, कोठडीत दोघांना सतत आणि अमानुष मारहाण करण्यात आली. त्यांचा रात्रभर छळ करण्यात आला. अहवालानुसार दोघांना गंभीर आघात आणि मोठ्या प्रमाणावर रक्तस्राव झाला, ज्यामुळे त्यांचा मृत्यू झाला. या घटनेनंतर संपूर्ण देशभर संतापाची लाट उसळली होती. लोकांनी पोलीस कोठडीतील अत्याचारांवर प्रश्न उपस्थित करत न्यायाची मागणी केली. प्रकरणाचे गांभीर्य लक्षात घेऊन अन्वेषण केंद्रीय अन्वेषण विभागाकडे सोपवण्यात आले.

दोषी पोलिसांची नावे

१. एस्. श्रीधर, पोलीस निरीक्षक
२. पी. रघु गणेश, उपनिरीक्षक
३. के. बालकृष्णन्, उपनिरीक्षक
४. एस्. मुरुगन, मुख्य हवालदार
५. ए. समदुरई, मुख्य हवालदार
६. एम्. मुथुराज, पोलीस शिपाई
७. एस्. चेल्लादुरई, पोलीस शिपाई
८. एक्स. थॉमस फ्रान्सिस, पोलीस शिपाई
९. एस्. वेलुमुथू, पोलीस शिपाई

या प्रकरणातील दहावा आरोपी विशेष उपनिरीक्षक पॉलदुरई याचा खटल्याच्या वेळी कोरानामुळे मृत्यू झाला.