Coaching Centre Insulting Marathi : नाशिक येथे मराठी भाषेचा अवमान करणार्‍या खासगी शिकवणीवर्गात मनसेने विचारला जाब !

नाशिक – शरणपूर रस्त्यावरील एका खासगी शिकवणीवर्गात परप्रांतीय शिक्षकांनी मराठी भाषेचा अवमान केला. येथे ‘मराठीत शिकवणार नाही. शिकायचे असेल, तर हिंदीतच शिका’, असे एका शिक्षकाने विद्यार्थ्यांना दरडावून सांगितल्याचा आरोप आहे. मराठीत शिकवण्यास नकार देत शिक्षकांनी मराठी भाषेला ‘गावठी’ म्हणून हिणवले. संबंधित घटनेची माहिती मिळताच मनसे कार्यकर्त्यांनी शिकवणीवर्गात जाऊन व्यवस्थापनाला जाब विचारला आणि मराठी बोलण्यास विरोध करणार्‍या दुष्प्रवृत्तींचा निषेध केला.

या वादाच्या वेळी मारहाण आणि गदारोळ झाल्याचा आरोप करत शिकवणीवर्ग व्यवस्थापकाने पोलीस ठाण्यात तक्रार केली. मनसे कार्यकर्त्यांनी ७ दिवसांत परप्रांतीय शिक्षकांची त्यागपत्रे घेऊन त्यांच्या जागी मराठी शिक्षकांची नियुक्ती करण्याची मागणी केली आहे, अन्यथा मनसे पद्धतीने तीव्र आंदोलन करण्याची चेतावणी दिली आहे. जाब विचारण्यासाठी गेलेल्या महाराष्ट्र नवनिर्माण सेनेच्या ५ पदाधिकार्‍यांवर सरकारवाडा पोलीस ठाण्यात गुन्हा नोंदवण्यात आला आहे.