सनातन प्रभात > Post Type > बातम्या > राष्ट्रीय बातम्या > PNB Retd DGM Digital Arrest : सायबर गुन्हेगारांकडून ‘पंजाब नॅशनल बँके’च्या निवृत्त उप महाव्यवस्थापकांची १ कोटी १० लाख रुपयांची फसवणूक !

PNB Retd DGM Digital Arrest : सायबर गुन्हेगारांकडून ‘पंजाब नॅशनल बँके’च्या निवृत्त उप महाव्यवस्थापकांची १ कोटी १० लाख रुपयांची फसवणूक !

चांगला परतावा देण्याचे आमिष दाखवून फसवणूक

लक्ष्मणपुरी (उत्तरप्रदेश) – ‘पंजाब नॅशनल बँके’चे निवृत्त उप महाव्यवस्थापक दिनेश शर्मा यांची १ कोटी १० लाख रुपयांची फसवणूक झाली. शर्मा यांना प्रथम एका व्हाट्सअ‍ॅप गटात जोडण्यात आले. त्यांना अत्यधिक व्याजातून मिळालेले परतावे दाखवण्यात आले. यावर विश्‍वास टाकत शर्मा यांनी त्यांच्या बँक खात्यातून तब्बल १ कोटी १० लाख रुपयांची घोटाळेबाजांकडे गुंतवणूक केली आणि त्यात ते पुरते फसले.

१. अलीगड येथील निवृत्त बँकिंग व्यावसायिक दिनेश शर्मा आरंभीला सावध होते; परंतु सायबर गुन्हेगारांनी त्यांना चांगल्या परताव्याचे आश्‍वासन देऊन जाळ्यात अडकवले.

‘पंजाब नॅशनल बँके’चे निवृत्त उप महाव्यवस्थापक दिनेश शर्मा

२. गुन्हेगारांनी प्रथम त्यांना ३०-४० टक्के परतावा देण्याचे आश्‍वासन देणारा संदेश पाठवला. त्यानंतर त्यांना एका व्हाट्सअ‍ॅप गटामध्ये जोडले गेले. गटामधील अनेक लोक चांगला परतावा मिळाल्याचा दावा करत होते.

३. फसवणूक करणार्‍यांनी शर्मा यांना एका छोट्या ठेवीपासून आरंभ करण्यास सांगितले. त्यानंतर शर्मा यांनी आरंभी ५ सहस्र रुपये ट्रान्सफर केले. या पैशांचा त्यांना मोठा परतावा मिळाल्याचे दाखवण्यात आले.

४. नफा पाहून शर्मा अधिकाधिक आकर्षित होत गेले. घोटाळेबाजांनी शर्मा यांचा विश्‍वास संपादन केला आणि त्यांना मोठी गुंतवणूक करण्यास सांगितली. त्यामुळे शर्मा यांनी १ कोटी १० लाख रुपये गुंतवले. त्यानंतर घोटाळेबाजांनी आणखी ३ कोटी रुपयांची मागणी केली. शर्मा यांना संशय आल्यावर त्यांनी कुटुंबियांना याविषयी माहिती दिली.

५. त्यानंतर त्यांना स्वतःची सायबर फसवणूक झाल्याचे लक्षात आले. त्यानंतर त्यांनी पोलिसांत तक्रार प्रविष्ट केली.

संपादकीय भूमिका

भारतात चौथ्या क्रमांकावर असलेल्या बँकेतील उच्चपदस्थ निवृत्त अधिकार्‍याची अशा प्रकारे फसवणूक होते, यावरून लोकांनी किती सतर्क रहायला हवे, हेच यातून दिसून येते !

नूतन लेख