सनातन प्रभात > Post Type > बातम्या > आंतरराष्ट्रीय बातम्या > Jamaat e Islami : पाक समर्थक कट्टरतावादी जमात-ए-इस्लामी पक्ष सरकार स्थापन करू शकतो !

Jamaat e Islami : पाक समर्थक कट्टरतावादी जमात-ए-इस्लामी पक्ष सरकार स्थापन करू शकतो !

बांगलादेशातील निवडणुकीच्या सर्वेक्षणात दावा

ढाका (बांगलादेश) : येत्या १२ फेब्रुवारीला बांगलादेशात संसदेच्या सार्वत्रिक निवडणुका होत आहेत. नुकत्याच झालेल्या दोन वेगवेगळ्या सर्वेक्षणांमध्ये कट्टरतावादी आणि पाकिस्तान समर्थक ‘जमात-ए-इस्लामी’ हा देशातील दुसरा सर्वांत मोठा पक्ष म्हणून उदयास आला आहे. तो माजी पंतप्रधान खालिदा झिया यांच्या ‘बांगलादेश नॅशनलिस्ट पार्टी’ (बीएन्पी) पक्षाला कडवी टक्कर देत आहे. अमेरिकी संस्था ‘इंटरनॅशनल रिपब्लिकन इन्स्टिट्यूट’ने डिसेंबर २०२५ मध्ये केलेल्या एका सर्वेक्षणात सांगितले होते की, बीएन्पीला  ३३ टक्के आणि जमातला २९ टक्के लोकांचा पाठिंबा मिळाला आहे. त्यानंतर जानेवारीमध्ये केलेल्या एका संयुक्त सर्वेक्षणात बीएन्पीला ३४.७ टक्के आणि जमातला ३३.६ टक्के पाठिंबा मिळाला होता. हे सर्वेक्षण ‘नरेटिव्ह, प्रोजेक्शन बीडी, इंटरनॅशनल इन्स्टिट्यूट ऑफ लॉ अँड डिप्लोमसी आणि जागोरोन फाऊंडेशन’ने संयुक्तपणे केले होते.

जमात-ए-इस्लामीने वर्ष १९७१ मध्ये बांगलादेशाच्या स्वातंत्र्याला विरोध केला होता आणि पाकिस्तानी सैन्याला साथ दिली होती. देशाच्या स्वातंत्र्यानंतर वर्ष १९७२ मध्ये तिच्यावर बंदी घालण्यात आली होती. ही बंदी १९७५ मध्ये हटवण्यात आली आणि १९७९ मध्ये झियाउर रहमान यांच्या राजवटीत पक्षाला निवडणुकीत भाग घेण्याची अनुमती मिळाली.

तज्ञांचे मत आहे की, लोकांमध्ये मागील सरकारच्या धोरणांविषयी राग आहे, ज्याचा लाभ जमातला मिळतांना दिसत आहे. जमात पक्ष आता ‘इस्लामच उपाय आहे’ अशी घोषणा देऊन स्वतःला एक नैतिक पर्याय म्हणून सादर करत आहे.

संपादकीय भूमिका

  • बांगलादेशात आता कुणीही सत्तेवर आला, तरी तो भारत आणि हिंदु द्वेषीच असणार, यात शंका नाही. त्यामुळे पश्चिमेला पाकिस्तान, तर पूर्वेला बांगलादेश या दोन्ही आघाड्यांवर भारताला लढावे लागणार आहे !
  • पुढील काही वर्षांत बांगलादेशातील हिंदूंची लोकसंख्या आतापेक्षा आणखी घटणार, हे वेगळे सांगायला नको !

नूतन लेख