UP Rohingya Arrest : भारतात रोहिंग्या मुसलमानांना घुसवून वसवणार्‍या टोळीतील इब्राहिम याला अटक

कानपूर (उत्तरप्रदेश) – म्यानमारमधील रोहिंग्या घुसखोर मुसलमानांना भारतात बेकायदेशीररित्या वसवणार्‍या टोळीतील महंमद इब्राहिम याला पोलिसांनी नुकतीच अटक केली. भारतातील १२ राज्यांत २०० हून अधिक रोहिंग्यांना त्याने वसवले असल्याचा संशय आहे. रोहिंग्या घुसखोरांचे जाळे म्यानमार, त्यानंतर बांगलादेश आणि तेथून भारतात आसामपासून काश्मीरपर्यंत पसरले आहे. ओळख पटू नये; म्हणून वेगवेगळ्या राज्यांत ते लपून रहात असल्याचे दिसून आले.

१. कानपूर सेंट्रल स्थानकावर पकडलेल्या महंमद इब्राहिम, महंमद हासिम उपाख्य नासिर आणि शोकतारा यांच्याकडून मिळालेल्या माहितीनुसार तिघेही मूळचे म्यानमारमधील नासाफुरु जिल्ह्यातील मोगंडो राखीन परिसरातील आहेत. ते बांगलादेशातील निर्वासित छावणीत रहात होते.

२. महंमद इब्राहिम वर्ष २०१७ मध्ये बांगलादेशातून भारतात आला. काही काळ तो देहलीत राहिला आणि वर्ष २०२४ मध्ये जम्मूमध्ये गेला. त्यानंतर तो बांगलादेशातून रोहिंग्यांना भारतात आणून स्थायिक करण्याच्या कामात सक्रीय झाला. अन्वेषण यंत्रणा त्याची सखोल चौकशी करत आहेत.