Assam Spy Arrest : आसाममध्ये पाकसाठी हेरगिरी करणार्‍या वायूदलाच्या माजी अधिकार्‍याला अटक

गौहत्ती (आसाम) – निवृत्त वायूसेना अधिकारी कुलेंद्र शर्मा याला पाकसाठी हेरगिरी केल्याच्या प्रकरणी अटक करण्यात आली. कुलेंद्र याचा पाकिस्तानी हस्तकाशी संबंध असल्याचा आरोप आहे. तो भारतीय सैन्याशी संबंधित संवेदनशील माहिती या हस्तकाला  देत होता. त्याचा भ्रमणभाष आणि लॅपटॉप यांमधून संशयास्पद सामुग्री मिळाली आहे.

अरुणाचल प्रदेशामध्ये २ संशयितांना अटक

अरुणाचल प्रदेशाची राजधानी इटानगरमध्ये पोलिसांनी हेरगिरीच्या आरोपाखाली २ जणांना अटक केली. पश्चिम सियांग जिल्ह्यातील आलो येथून एकाला, तर चांगलांग जिल्ह्यातील मियाओ येथून अन्य हेराला अटक करण्यात आली. यांपैकी एकाची ओळख हिलाल अहमद अशी झाली आहे. तो जम्मू-काश्मीरमधील कुपवाडा जिल्ह्यातील आहे. पोलिसांनी दुसर्‍याचे नाव सांगितले नाही. हिलाल त्याच्या सहकार्‍यांना सुरक्षेशी संबंधित संवेदनशील माहिती पाठवत होता.