‘बाबरी मशीद एक दिवस पुन्हा बांधली जाईल’, असे लिखाण करणार्‍या मुसलमानावरील गुन्हा रहित करण्यास सर्वोच्च न्यायालयाचा नकार

नवी देहली – ‘तुर्कीयेमध्ये ज्याप्रकारे सोफिया मशीद पुन्हा बांधली गेली, त्याप्रमाणे एक दिवस बाबरी मशीदही पुन्हा बांधली जाईल’, असे फेसबुकवर लिखाण करणार्‍या महंमद फैय्याज मन्सुरी याच्यावरील गुन्हा रहित करण्यास सर्वोच्च न्यायालयाने नकार देत अलाहाबाद उच्च न्यायालयाचा निर्णय अबाधित ठेवला. अलाहाबाद उच्च न्यायालयाने खटला रहित करण्यास नकार दिल्यानंतर मन्सुरी याने त्याला सर्वोच्च न्यायालयात आव्हान दिले होते.

५ ऑगस्ट २०२० या दिवशी आरोपी फैय्याज मन्सुरी याने बाबरी मशिदीविषयी वरील वादग्रस्त लिखाण केले होते. त्यानंतर दुसर्‍याच दिवशी त्याच्या विरोधात गुन्हा नोंद करून ८ ऑगस्ट २०२० या दिवशी त्याला अटक करण्यात आली. पुढे ‘राष्ट्रीय सुरक्षा कायद्या’नुसार त्याच्यावर गुन्हाही नोंद झाला.