North South Korea Tension : उत्तर कोरियाच्या सैनिकांवर दक्षिण कोरियाचा गोळीबार !

सेऊल (दक्षिण कोरिया) – दक्षिण कोरियाने उत्तर कोरियाच्या २० सैनिकांवर गोळीबार केल्याची घटना समोर आली आहे. संबंधित घटना गंगवॉन प्रांतातील चेओरवॉन येथे घडली. दक्षिण कोरियाच्या सैनिकांनी आधी चेतावणी दिली आणि त्यानंतर गोळीबार केला. गोळीबारानंतर उत्तर कोरियाचे सैनिक मागे हटले. या घटनेमुळे दोन्ही देशांमधील संघर्ष पुन्हा एकदा वाढण्याची शक्यता आहे. उत्तर कोरियाला चीन आणि रशिया यांचा पाठिंबा आहे, तर दक्षिण कोरिया हा अमेरिका आणि जपान यांचा मित्रराष्ट्र आहे. त्यामुळे या दोन देशांतील संघर्षामुळे आशियाई शीतयुद्धाला प्रारंभ होण्याची शक्यता वर्तवली जात आहे.

उत्तर कोरियाने अलीकडे अनेक क्षेपणास्त्रांची चाचणी केली आहे. त्यापैकी एक चाचणी अमेरिकेचे राष्ट्राध्यक्ष डॉनल्ड ट्रम्प यांनी जपान दौर्‍याची घोषणा केल्यानंतर करण्यात आली. दक्षिण कोरिया, उत्तर कोरियावर अण्वस्त्र नष्ट करण्यासाठी दबाव आणत आहे; पण उत्तर कोरियाचे हुकूमशहा किम जोंग उन यांनी त्यास नकार दिला आहे.