‘महापारेषण’च्या वांद्रे (मुंबई) येथील कार्यालयातील सनातन संस्थेच्या ग्रंथप्रदर्शनाला उत्स्फूर्त प्रतिसाद !

मुंबई – आत्मनिर्भर भारत, स्वदेशी उत्पादनांना प्रोत्साहन आणि महिलांसाठी रोजगाराची संधी या हेतूने दिवाळीच्या निमित्ताने वांद्रे येथील ‘महापारेषण’च्या (महाराष्ट्र राज्य विद्युत पारेषण कंपनी लिमिटेड) कार्यालयामध्ये विविध स्वदेशी उत्पादनांचे कक्ष उभारण्यात आले होते. यानिमित्त येथे असलेल्या सनातन संस्थेचे ग्रंथ आणि सात्त्विक उत्पादनांच्या कक्षाला नागरिकांचा उत्स्फूर्त प्रतिसाद लाभला. या वेळी महापारेषणचे अध्यक्ष तथा व्यवस्थापकीय संचालक डॉ. संजीव कुमार आणि अपर जिल्हाधिकारी तथा महापारेषणच्या कार्यकारी संचालक सौ. सुचिता भिकाने यांनी सनातनच्या प्रदर्शनाला भेट दिली.

१७, १८ ऑक्टोबर असे २ दिवस हे ग्रंथप्रदर्शन आणि स्वदेशी सात्त्विक उत्पादने यांचा कक्ष लावण्यात आला होता. या ठिकाणी आयुर्वेद, आपत्काळात घ्यावयाची दक्षता, नैतिक मूल्ये-संस्कार, भारतीय संस्कृतीनुसार दिनचर्येचे महत्त्व, अध्यात्म, तणावमुक्त जीवनासाठी उपाययोजना आदी विविध विषयांचे ग्रंथ या कक्षावर उपलब्ध होते. कार्यक्षमता, एकाग्रता राखून तणावमुक्त, चुका टाळून आणि उत्साहाने कामकाज कसे करावे, याविषयी उत्तम मार्गदर्शन असलेल्या प्रदर्शनातील ग्रंथांचा येथील कर्मचारीवर्ग आणि नागरिक यांना चांगला लाभ झाला.