महापालिकेच्या शाळेत वर्गशिक्षकाचे अल्पवयीन विद्यार्थिनींसमवेत वर्गात अश्लील कृत्य !

पिंपरी (पुणे) – महापालिकेच्या शाळेत इयत्ता ४ थीमध्ये शिकणार्‍या अल्पवयीन विद्यार्थिनीसमवेत वर्गशिक्षकाने अश्लील वर्तन केल्याचा प्रकार उघडकीस आला आहे. या प्रकरणी चिंचवड पोलिसांनी तात्काळ गुन्हा नोंद करून आरोपी वर्गशिक्षक मनोज धाईंजे याला अटक केली आहे. आरोपी धाईंजे हा वाल्हेकरवाडी येथील महापालिकेच्या शाळेत कार्यरत आहे. घटनेच्या दिवशी विद्यार्थिनी वर्गात उपस्थित होती, त्या वेळी शिक्षकाने तिच्या जवळ जाऊन गैरवर्तन केल्याचे प्राथमिक अन्वेषणातून समोर आले. विशेष म्हणजे त्या वेळी वर्गात इतर विद्यार्थी उपस्थित असतांनाही शिक्षकाने हे कृत्य केल्याचे समजते. झालेल्या घटनेनंतर घाबरलेल्या विद्यार्थिनीने घरी जाऊन पालकांना घडलेला प्रकार सांगितला. पालकांनी तात्काळ चिंचवड पोलीस ठाण्यात जाऊन तक्रार प्रविष्ट केली. पोलिसांनी धाईजे याला अटक करून न्यायालयात उपस्थित केल्यानंतर त्याला २ दिवसांची पोलीस कोठडी सुनावली आहे.