अधिक भाडे आकारणार्‍या ९ सहस्र १५८ खासगी ट्रॅव्हल्सवर कारवाई !

मुंबई – सरकारने निश्चित करून दिलेल्या भाड्यापेक्षा अधिक भाडे आकारणार्‍या राज्यातील ९ सहस्र १५८ खासगी ट्रॅव्हल्स गाड्यांवर प्रादेशिक परिवहन विभागाकडून कारवाई करण्यात आली आहे. एप्रिल २०२५ ते मे २०२६ या १४ महिन्यांत ही कारवाई करण्यात आली आहे. या कालावधीत प्रादेशिक परिवहन विभागाने एकूण ५१ सहस्र १०४ वाहनांची पडताळणी केली होती. दोषी आढळलेल्या वाहनांकडून ४६१ लाख ११ सहस्र रुपये इतका दंड वसूल करण्यात आला आहे. २४ जून या दिवशी विधान परिषदेत एका तारांकित प्रश्नावरील लेखी उत्तरामध्ये परिवहन विभागाकडून ही माहिती देण्यात आली.

एप्रिल २०२५ ते मार्च २०२६ या कालावधीत प्रवाशांची अवैध वाहतूक करणार्‍या ११ सहस्र १४० वाहनचालकांवर कारवाई करण्यात आली आहे. त्यांच्याकडून ४३२ कोटी ७६ सहस्र रुपये वसूल करण्यात आले आहेत.