आजीची भाजी रानभाजी – लाल भोपळा

‘चल रे भोपळ्या टुणूक टुणूक…’ या गोष्टीतून आपल्याला या भोपळ्याची तशी बालपणीच ओळख झालेली आहे. थोडे कळू लागल्यावर या भोपळ्याची पिवळी, केसरी फोड बाजारात सतत पहायला मिळालेली. याखेरीज गोड घारगे खायला कुणाला आवडणार नाहीत. तो रुचकर पदार्थही यापासूनच बनवला जातो.       

(भाग २१)

याआधीचा भाग वाचण्यासाठी येथे क्लिक करा : https://sanatanprabhat.org/marathi/948252.html

लाल भोपळा  

लाल भोपळा हे एक वेलवर्गीय फळ आहे. त्याच्या पानांची, तसेच फळाची भाजी बनवली जाते. त्याचसमवेत भोपळ्याची खीर आणि पराठे बनवले जातात. भोपळा आरोग्यासाठी पुष्कळ लाभदायक आहे. त्याचे फळ गोलाकार असते. यात पुष्कळ बिया असतात. फळाचे वजन ४ ते ८ किलोपर्यंत असू शकते. सर्वांत मोठी प्रजाती ‘मैक्सिमा’चे वजन ३४ किलोपेक्षा अधिक असते. हा संपूर्ण जगात लावला जातो. मोठ्या आजारानंतर शरीर कमजोर झाले असल्यास आहारात भोपळा घेतला पाहिजे. काही दिवसांनी थकवा दूर होतो.

भोपळा हृदयरोगींसाठी पुष्कळ लाभदायक आहे. तो कोलेस्ट्रॉल न्यून करतो. भोपळा उष्णता न्यून करणारा आणि लघवीला उत्तेजन देणारा आहे, तसेच पोटाच्या समस्या दूर करतो. रक्तातील साखरेचे प्रमाण नियंत्रित करतो. भोपळ्याला आरोग्यवर्धक मानले जाते. भोपळ्यामध्ये ‘बिटा कॅरोटीन’ असते, ज्यामुळे ‘अ’ जीवनसत्त्व मिळते. पिवळ्या आणि केशरी रंगाच्या भोपळ्यामध्ये ‘कॅरोटीन’चे प्रमाण अधिक असते. याच्या बिया आयर्न, झिंक, पोटॅशियम आणि मॅग्नेशियम यांचा चांगला स्रोत आहेत. जगभरात भोपळ्याचा उपयोग केला जातो, म्हणून २९ सप्टेंबरला ‘पम्पकिन डे’ साजरा केला जातो.

– श्री. प्रशांत सातपुते, जिल्हा माहिती अधिकारी, रत्नागिरी.

यापुढील भाग वाचण्यासाठी येथे क्लिक करा : https://sanatanprabhat.org/marathi/948945.html