विद्यार्थ्यांसाठी क्रांतीकारकांच्या चित्रप्रदर्शनावर आधारित स्पर्धांचे आयोजन करणार ! – भारतबापू यादव, श्री शिवप्रतिष्ठान हिंदुस्थान

भोसे (जिल्हा सांगली) येथे क्रांतीकारकांच्या चित्र प्रदर्शनाला विद्यार्थी, शिक्षक आणि राष्ट्रप्रेमी यांचा उत्स्फूर्त प्रतिसाद !

सांगली, १९ ऑगस्ट (वार्ता.) – क्रांतीकारकांच्या चित्र प्रदर्शनातील माहितीआधारे विद्यार्थ्यांसाठी स्पर्धांचे आयोजन करणार आहोत. विद्यार्थ्यांना क्रांतीकारकांच्या जीवनपटाचा अभ्यास करण्यासाठी प्रोत्साहन मिळावे, या उद्देशासाठी  स्पर्धा आयोजित करण्यात आली. यातील विजयींना  विविध पुरस्कार देण्यात येतील, असे श्री शिवप्रतिष्ठान हिंदुस्थानचे विभाग प्रमुख श्री. भारतबापू यादव यांनी हिंदु जनजागृती समितीचे श्री. राजेंद्र माळी आणि श्री. गिरीश पुजारी यांना सांगितले. भोसे (तालुका मिरज) येथे गांधी चौक येथील कार्यक्रमात हिंदु जनजागृती समितीच्या वतीने क्रांतिकारकांच्या चित्र प्रदर्शनाचे आयोजन करण्यात आले होते, त्या वेळी ते बोलत होते. या प्रदर्शनाचा येथील शालेय आणि महाविद्यालयीन विद्यार्थी, नागरिक, सरपंच, पदाधिकारी आणि राष्ट्रप्रेमी अशा सर्वांनीच लाभ घेतला.

१. ग्रामपंचायतीच्या वतीने ‘सर्व शिक्षा अभियानां’तर्गत १०० हून अधिक विद्यार्थ्यांचा मानचिन्ह आणि प्रमाणपत्र देऊन सत्कार करण्यात आला. ‘जय हिंद आजी-माजी सैनिक संघटने’च्या सदस्यांचा सन्मान करण्यात आला.

२. या कार्यक्रमात येथील वारकरी संप्रदायाच्या वतीने सर्व वारकरी पालखी घेऊन टाळ-मृदंग आणि विठ्ठलनामाचा गजर करत पालखी घेऊन सहभागी झाले होते. अनेक विद्यार्थ्यांनी या वेळी देशभक्तीपर गीतांवर आधारित लेझीम पथक आणि नृत्य सादर केले.

३. येथील सरपंच श्री. पारसनाथ चौगुले, ग्रामपंचायत सदस्या सौ. सीमा जगदाळे, येथील ४ शाळांचे मुख्याध्यापक आणि वरिष्ठ शिक्षक, ‘ग्रामपंचायत करियर अकॅडमी’चे विद्यार्थी यांना या वेळी ‘राष्ट्रध्वजाचा सन्मान राखा’ या अभियानांतर्गत निवेदन सादर करण्यात आले.

४. या प्रदर्शनाचे आयोजन करण्यासाठी येथील उद्योजक श्री. ऋषिकेश यादव, श्री. विनायक कोळी आणि सरपंच श्री. पारसनाथ चौगुले यांसह येथील सर्वांचेच मोलाचे सहकार्य लाभले.