पुणे ‘इसिस मॉड्यूल’ प्रकरणात ११ व्या आतंकवाद्याला अटक !

या आतंकवाद्याच्या अटकेमुळे मोठे खुलासे होण्याची शक्यता

पुणे – ‘इंप्रूव्हाईज एक्सप्लोझिव्ह डिव्हाईस (‘आयईडी’)’ म्हणजे बाँब बनवण्याचे आणि गोळ्या झाडण्याचे प्रशिक्षण देणार्‍या इसिसच्या रिझवान अली उपाख्य अबू सलमा उपाख्य मौला या आतंकवाद्याला राष्ट्रीय अन्वेषण यंत्रणेने (‘एन्.आय.ए.’ने) बेड्या ठोकल्या आहेत. ‘इसिस मॉड्यूल’ प्रकरणातील तो एक मुख्य आरोपी असल्याने त्याच्याविरुद्ध विशेष एन्.आय.ए. न्यायालयाने अजामीनपात्र वॉरंट काढले होते. हा या गुन्ह्यातील अटक केलेला ११ वा आरोपी आहे. त्याच्यावर ३ लाख रुपयांचे पारितोषिकही घोषित करण्यात आले होते. या आतंकवाद्याच्या अटकेमुळे आणखी मोठे खुलासे होण्याची शक्यता आहे. ‘एन्.आय.ए.’च्या अन्वेषणात उघड झाल्याप्रमाणे रिझवान अली हा इसिसच्या भारतातील कारवायांमध्ये सक्रीयपणे सहभागी होता.

या प्रकरणात आतापर्यंत महंमद इम्रान खान, महंमद युनूस साकी, अब्दुल कादिर पठाण, सीमाब नासिरुद्दीन काझी, झुल्फिकार अली बारोदवाला, शामिल नाचन, अकीफ नाचन, शहनवाज आलम, अब्दुल्ला फैयाज शेख, तल्हा खान यांना अटक करण्यात आली आहे.