Amarnath Yatra 2025 : अमरनाथ यात्रेला प्रारंभ : साडेतीन लाख भाविकांची नोंदणी

जम्मू (जम्मू-काश्मीर) – हिंदूंसाठी अत्यंत पवित्र आणि श्रद्धेचे प्रतीक असलेल्या अमरनाथ यात्रेसाठी भाविकांचा पहिला चमू २ जुलैला जम्मूहून मार्गस्थ झाला. जम्मू-काश्मीरचे उपराज्यपाल मनोज सिन्हा यांनी हिरवा झेंडा दाखवल्यानंतर यात्रेला प्रारंभ झाला. ३८ दिवसांची ही यात्रा पहलगाम आणि बालटाल या दोन्ही मार्गांवरून जाईल. रक्षाबंधन, म्हणजेच ९ ऑगस्टला ही यात्रा संपेल.

गेल्या वर्षी ५ लाख भाविकांनी अमरनाथ येथील पवित्र गुहेचे दर्शन घेतले होते. यंदाही अद्यापपर्यंत साडेतीन लाखांहून अधिक यात्रेकरूंनी नोंदणी केली आहे. तात्काळ नोंदणीचीही व्यवस्था जम्मूमधील सरस्वती धाम, वैष्णवी धाम, पंचायत भवन आणि महाजन सभा येथे करण्यात आली आहे. प्रत्येक केंद्रावर २ सहस्र भाविकांची नोंद केली जाऊ शकते.