लोकोपयोगी कायदे करण्यात महाराष्ट्र देशात अग्रेसर ! – मुख्यमंत्री

मुंबई – महाराष्ट्र हे देशात सर्व क्षेत्रांत अग्रगण्य राज्य आहे. लोकोपयोगी कायदे निर्मितीमध्येही राज्य देशात अग्रेसर आहे. राज्याच्या कायद्याचे अनुकरण देशातील इतर राज्यच नाही, तर अन्य देशही करतात, असे गौरवोद्गार मुख्यमंत्री देवेंद्र फडणवीस यांनी काढले. विधी आणि न्याय विभागाच्या सुवर्ण महोत्सवी वर्षानिमित्त आयोजित कार्यक्रमात सह्याद्री अतिथीगृह येथे ते बोलत होते. या वेळी विधी विधान शाखेच्या बोधचिन्हाचे अनावरण आणि ५ पुस्तकांचे प्रकाशन फडणवीस यांच्या हस्ते करण्यात आले.

फडणवीस पुढे म्हणाले की, महाराष्ट्राच्या जडणघडणीमध्ये विधी आणि न्याय विभागाचे महत्त्वपूर्ण योगदान आहे. कायदा निर्मितीमध्ये विधी आणि न्याय विभागाचे महत्त्वपूर्ण योगदान असते. राज्याचे अनेक कायदे देशाने स्वीकारले आहेत.

कायद्याची निर्मिती होत असतांना विधीमंडळात कायद्यांवर ३-३ दिवस चर्चा होते. चर्चेतून कायदा अस्तित्वात येत असतो. या विभागाचे सुवर्ण महोत्सवी वर्ष असून निश्चितच या विभागात परिवर्तनाचा आरंभ या वर्षीपासून करावा.

सध्याची परिस्थिती लक्षात घेऊन लोकोपयोगी कायद्यांची निर्मिती करावी लागते. या संपूर्ण प्रक्रियेत ‘कायदा लिहिणे’ अत्यंत महत्त्वाचे असते. लोकांच्या हिताच्या दृष्टीने कायदा कसा असावा ? असा शासनाचा नेहमी प्रयत्न असतो. विधी आणि न्याय विभागाने निर्मित केलेली पुस्तके पुढील पिढीसाठी ठेवा आहेत. हे संदर्भ साहित्य म्हणून निश्चितच कायदा निर्मितीमध्ये उपयोगात येणार आहे, असेही मुख्यमंत्री म्हणाले.