Encounter In Manipur :  मणीपूरमध्ये चकमकीत ११ आतंकवादी ठार

इंफाळ – मणीपूरमधील जिरीबाम जिल्ह्यात केंद्रीय राखीव पोलीस दलाचे सैनिक आणि आतंकवादी यांच्यात झालेल्या चकमकीत ११ कुकी आतंकवादी ठार झाले. अधिकृत सूत्रांनी दिलेल्या माहितीनुसार, आसाम सीमेवर कुकी आतंकवाद्यांनी केंद्रीय राखीव पोलीस दलाच्या छावणीवर बेछूट गोळीबार केला. त्याला तात्काळ प्रत्युत्तर देतांना केंद्रीय राखीव पोलीस दलाच्या सैनिकांनी ११ आतंकवाद्यांना ठार मारले. या चकमकीत २ सैनिकही घायाळ झाले आहेत.

सूत्रांनी सांगितले की, मणीपूरमधील हिंसाचारामुळे विस्थापित झालेल्या लोकांसाठी पोलीस ठाण्याजवळ एक साहाय्य छावणी उभारण्यात आली आहे. या छावणीमध्ये रहाणारे लोक कुकी आतंकवाद्यांचे लक्ष्य होते. याआधीही येथे अनेकदा आक्रमणे झाली आहेत. या आतंकवाद्यांनी सैनिकांसारखा गणवेश परिधान केला होता. त्यांच्याकडे आधुनिक शस्त्रे आणि दारूगोळा होता.