बनावट चलनाद्वारे सातारा जिल्हा परिषदेची २८ लाख ५० सहस्र रुपयांची फसवणूक !

सातारा, २४ जून (वार्ता.) – सातारा जिल्हा परिषदेच्या वतीने संमत करण्यात आलेल्या लघुपाटबंधारे विभागाच्या विविध विकासकामांसाठी सुरक्षा ठेव आणि अतिरिक्त सुरक्षा ठेव भरल्याचे बनावट चलन सादर करून २८ लाख ५० सहस्र ९५० रुपयांची फसवणूक केल्याचा गंभीर प्रकार उघड झाला आहे. या प्रकरणी सातारा शहर पोलीस ठाण्यात दोघांविरुद्ध गुन्हा नोंद करण्यात आला आहे.

महसूल आणि वन विभागाच्या शासन निर्णयानुसार ‘राज्य आपत्ती सौम्यीकरण निधी’तून जिल्हा परिषद लघुपाटबंधारे विभागांतर्गत विविध कामांना मान्यता देण्यात आली होती. यामध्ये माण तालुक्यातील काही गावांच्या पाझर तलाव आणि ग्राम तलाव दुरुस्तीची कामे समाविष्ट होती. या कामासाठी न्यूनतम दर देणारे ठेकेदार म्हणून निवड झाल्यानंतर शासनाकडे जमा करायची सुरक्षा ठेव आणि अतिरिक्त सुरक्षा ठेव प्रत्यक्षात न भरता बँकेचा बनावट ‘रिसिव्हड’ शिक्का, रोखपालाची बनावट स्वाक्षरी इत्यादी करून चलने सिद्ध करण्यात आली, असा आरोप आहे. याविषयी बनावट चलने करणारे योगेश रवींद्र बर्गे आणि विजय बापूसाहेब घाडगे यांच्याविरुद्ध जिल्हा परिषद कर्मचारी अरुणकुमार दिलपाक यांनी तक्रार दिली आहे. तक्रारीवरून गुन्हा नोंद करण्यात आला आहे.