दिवसभरातील घडामोडींवर एक दृष्टीक्षेप : पोहतांना तुटलेली टाईल्स लागून जखम !; मुलींचा विनयभंग करणारे दोघे अटकेत !…

पोहतांना तुटलेली टाईल्स लागून जखम !

डोंबिवली – येथील क्रीडासंकुलातील तरण तलावात पोहतांना तन्मय कांबळे याला तुटलेली टाईल्स लागून हाताला जखम झाली. त्याने याविषयी पालिका कर्मचार्‍यांना सांगितले; पण त्यांनी त्याकडे दुर्लक्ष केले. (पालिकेचा निष्काळजी कारभार ! – संपादक) तरण तलावाच्या ठिकाणी प्रथमोपचार पेटीही नसल्याने त्याला घरीच जावे लागले.

मुलींचा विनयभंग करणारे दोघे अटकेत !

मुंबई – येथे अनुक्रमे ५ वर्षीय आणि १५ वर्षीय मुलीचा विनयभंग केल्याप्रकरणी पोलिसांनी गुन्हा नोंदवून २ आरोपींना अटक केली आहे. मंदिरातील २० वर्षांच्या पुजार्‍याने ५ वर्षांच्या मुलीशी अश्लील चाळे केले, तर इमारतीतील रहिवाशाने शिकवणीवर्गाहून घरी येणार्‍या १५ वर्षीय मुलीचा पाठलाग करून तिच्याशी लगट करण्याचा प्रयत्न केला.

पालघर जिल्हा परिषदेच्या शाळा धोकादायक स्थितीत !

पालघर – येथील जिल्हा परिषदेच्या शाळांची स्थिती धोकादायक झालेली आहे. तालुका स्तरावर धोकादायक, मोडकळीस आलेल्या आणि किरकोळ नूतनीकरण करावयाचे असलेल्या अशा एकूण १२१ शाळांमधील १९५ वर्गखोल्या आहेत.

नाशिक-पुणे महामार्गावर उड्डाणपुलाच्या छताला तडे !

नाशिक – नाशिक-पुणे महामार्गावर गेल्या तीन वर्षांपूर्वी उभारण्यात आलेल्या येथील उड्डाणपुलाच्या छताला तडे गेले आहेत. त्यामुळे तेथून पाण्याची गळती होत आहे.