Weather forecast : यंदा १०६ टक्के पाऊस पडण्याचा हवामान खात्याचा अंदाज !

३१ मे या दिवशी मोसमी पावसाचे केरळमध्ये आगमन होण्याची शक्यता !

नवी देहली – भारतीय हवामान खात्याच्या अनुमानानुसार यंदा मोसमी पावसाचे (मान्सूनचे) ३१ मे या दिवशी केरळमध्ये आगमन होईल. ‘हा अंदाज ४ दिवस पुढे-मागे होऊ शकतो’, असेही खात्याने स्पप्ट केले. याचा अर्थ २८ मे ते ३ जून या कालावधीत कधीही मोसमी पावसाचे केरळमध्ये आगमन होऊ शकते. वर्ष २०२४ मध्ये १०६ टक्के, म्हणजेच ८७ से.मी. पाऊस पडू शकतो. यात पावसाळ्याच्या ४ महिन्यांत ८६.६ से.मी. पाऊस पडण्याची शक्यता आहे.

१. अंदमान समुद्र आणि बंगालचा उपसागर येथील बेटांवर यंदा नेहमीपेक्षा २ दिवस अगोदर, म्हणजेच १९ मे या दिवशी पावसाचे आगमन होण्याची शक्यता आहे.

२. ‘एल् निनो’ आणि ‘ला निना’ असे हवामानाचे दोन प्रकार आहेत. यंदा ‘एल् निनो’ची परिस्थिती संपली असून ३-५ आठवड्यांत ‘ला निना’ची स्थिती निर्माण होऊ शकते.

३. ‘एल् निनो’मध्ये समुद्राचे तापमान ३ ते ४ अंशांनी वाढते. त्याचा प्रभाव १० वर्षांतून दोनदा जाणवतो.  हा प्रकार जागतिक तापमानवाढीचा परिणाम आहे. याच्या प्रभावामुळे अधिक पाऊस असलेल्या भागांत अल्प पाऊस, तर अल्प पाऊस असलेल्या भागांत अधिक पाऊस पडतो.

४. दुसरीकडे ‘ला निना’मध्ये समुद्राचे पाणी झपाट्याने थंड होते. त्याचा जगभरातील हवामानावर परिणाम होतो. आकाश ढगाळ होते आणि जोरदार पाऊस पडतो.